पणजी: काँग्रेसचे 8 बंडखोर नेते भाजपात स्थिरावले आहेत. आज ते दिल्लीला निघाले असून हायकमांडशी चर्चा करुन परल्यानंतर गोवा मंत्रीमंडळातील खांदेपालट होणार आहे. मुख्यमंत्री डॉ. प्रमोद सावंत यांनी दिल्ली दौऱ्याबाबत नुकतीच माहिती दिली आहे.

(8 Goa Congress MLAs will meet Prime Minister Narendra Modi in Delhi)

काँग्रेसमधून भाजपात आलेले दिगंबर कामत, मायकल लोबो, केदार नाईक, संकल्प आमोणकर, राजेश फळदेसाई, रुडाल्फ फर्नांडिस, दिलायला लोबो आणि आलेक्स सिक्वेरा या आठजणांसह ते स्वतः आणि प्रदेशाध्यक्ष सदानंद शेट तानावडे आज दिल्लीला निघाले आहोत. उद्या ते पंतप्रधान नरेंद्र मोदी यांची भेट घेणार आहेत.

लोबो घाईघाईने दिल्लीकडे

कळंगुटचे आमदार मायकल लोबो आपल्या मित्राच्या लग्नासाठी दक्षिण आफ्रिकेला गेले आहेत ते आज रात्री परस्पर दिल्लीत दाखल होण्याची शक्यता आहे. मात्र, त्यांच्या विमानाला विलंब झाला किंवा नियोजन बदलले, तर मोदींची एकत्रित भेट मिळणार नाही. त्यामुळे ते घाईघाईने दिल्लीकडे निघाल्याची माहिती आहे. भाजपात दाखल होण्याची सर्वाधिक आतुरता लोबो यांनाच लागली होती. त्यामुळे त्यांच्यासाठी ही दिल्ली भेट महत्त्वाची आहे.

पदांबाबत भेटीनंतर स्पष्टता

पहिल्यांदाच होत असलेली फुटीर बंडखोरांची दिल्ली भेट महत्त्वाची असून या भेटीनंतरच त्यांना कोणती पदे मिळणार याबाबतची स्पष्टता होणार आहे. मुख्यमंत्र्यांनीही यापूर्वी दिल्ली भेटीनंतर ‘त्यांना’ मंत्रिमंडळात घ्यायचे की नाही याशिवाय त्यांना कोणती पदे द्यायची हे ठरणार असल्याचे सांगितले आहे. त्यामुळे त्यांची उद्या सोमवारी होणारी दिल्ली भेट महत्त्वाची असून या भेटीमध्ये गोव्यातील हे नेते राष्ट्रीय नेत्यांची भेट घेणार आहेत.