Vasco Death News: वाड्डे येथील दुर्गा माता मंदिराजवळ राहणाऱ्या वाणी खानापूर या 6 वर्षीय मुलीचा डेंग्यूच्या तापाने मृत्यू झाल्याच्या निषेधार्थ आज (मंगळवारी) संतप्त नागरिकांनी चिखली उपजिल्हा रुग्णालयातील डॉक्टर आणि कर्मचाऱ्यांना घेराव घातला. नागरिकांच्या म्हणण्यानुसार, रुग्णालयातील डॉक्टरांच्या हलगर्जीपणामुळे मुलीचा मृत्यू झाला.

काल (सोमवारी) संध्याकाळी मुलीला चिखली उपजिल्हा रुग्णालयात दाखल करण्यात आले. मंगळवारी पहाटे तिचा रक्तदाब कमी झाल्याने तिला बांबोळी येथील जीएमसी रुग्णालयात हलवण्यात आले.

त्यानंतर, आज सकाळी 9 वाजताच्या सुमारास डेंग्यूच्या तापावर जीएमसीमध्ये उपचार सुरू असताना तिचा मृत्यू झाला.

चिखली उपजिल्हा रुग्णालयातील डॉक्टरांच्या हलगर्जीपणामुळे मुलीचा मृत्यू झाल्याचा आरोप न्यू वाड्डे येथील रहिवाशांनी केला असून, या प्रकरणाची संबंधित अधिकाऱ्यांनी चौकशी करावी, अशी मागणी ग्रामस्थांनी केली आहे.