Fraud in Goa : निम्म्या किमतीमध्ये डिझल इंधन पुरवठा करतो असे सांगून मोबोर येथील एका व्यक्तीची लाखोंची फसवणूक करण्यात आली आहे. मिंगेल रोड्रिग्स (57) असं या व्यक्तीचं नाव असून त्याला एक लाख रुपयांचा चुना एका ठगाने लावला आहे. या व्यवहारात आपण फसवले गेलो हे लक्षात आल्यावर त्याने आता पोलिसात तक्रार दिली आहे.

रॉड्रिग्ज यांनी कोलवा पोलीस स्थानकात दिलेल्या तक्रारीत कॅप्टन दीपक कुमार नावाच्या एका इसमाने आपल्याला मोबाईलवरून संपर्क साधून अर्ध्या किमतीमध्ये डिझल पुरवठा करतो असे सांगितले. त्यासाठी इरफान मन्सुरी याच्या खात्यामध्ये एक लाख रुपये जमा करायला लावले.

रॉड्रिग्ज यांनी या खात्यात ही रक्कम जमा केली मात्र त्यांना इंधन पुरवठा केलाच गेला नाही. अशाने त्याने आपली फसवणूक केली असल्याचे तक्रारीत नमूद केले आहे. या प्रकरणी कोलवा पोलिसांकडून पुढील तपास करण्यात येत आहे.

केवायसीच्या नावाखाली फातोर्ड्यातील एका महिलेला लाखोंचा गंडा घातल्याचा धक्कादायक प्रकार आता समोर आला आहे. एसबीआय या नामांकित बँकेचा कर्मचारी असल्याचं भासवत तोतयाने महिलेचे तब्बल 10.53 लाख लुटले आहेत. याप्रकरणी पोलिसांनी अज्ञात चोराविरोधात तक्रार दाखल केली असून तपास सुरु केला आहे.

तर दुसरीकडे एका नामांकित कंपनीची डिलरशिप देण्याचे आमिष दाखवून 12.75 लाखांना गंडा घातल्याप्रकरणी सांताक्रुझ येथील एका कंपनीने सायबर क्राईम पोलिस स्थानकात तक्रार दाखल केली आहे.

आयटीसी कंपनीचा कर्मचारी असल्याची बनावट ओळख दाखवून संशयिताने तक्रारदाराला ऑनलाईन गंडा घातल्‍याचे पोलिसांनी सांगितले. मिळालेल्‍या माहितीनुसार, सांताक्रुझ येथील एका कंपनीला एका व्यक्तीने आपण आयटीसी कंपनीचा कर्मचारी असल्याचे सांगितले आणि त्याची फसवणूक केली.