पणजी: बिहारमधील मुझफ्फरपूर येथील ५ वर्षांची मुलगी संध्या कुमारी हिचा हडफडे येथील हॉटेलच्या जलतरण तलावात बुडून मृत्यू झाला. ही घटना काल संध्याकाळी ४.३० वा. घडली असून हणजूण पोलिसांनी हॉटेलच्या व्यवस्थानाविरुद्ध निष्काळजीपणाचा गुन्हा दाखल केला आहे.

ही घटना घडली तेव्हा तेथे जलतरण तलावाशेजारी हॉटेलचा जीवरक्षक नव्हता. हॉटेलमधील सीसी टीव्ही कॅमेऱ्याद्वारे त्या ठिकाणी कोणी नसल्याचे सिद्ध झाले आहे. ही घटना घडली तेव्हा तेथे जलतरण तलावाशेजारी हॉटेलचा जीवरक्षक नव्हता. हॉटेलमधील सीसी टीव्ही कॅमेऱ्याद्वारे त्या ठिकाणी कोणी नसल्याचे सिद्ध झाले आहे, अशी माहिती पोलिसांनी दिली.

मिळालेल्या माहितीनुसार, ही ५ वर्षांची मुलगी आपल्या पालकांसमवेत जलतरण तलावात काल दुपारी उतरली होती. त्यानंतर तिचे पालक व ती हॉटेलमध्ये जाण्यासाठी निघाले तेव्हा ती सुद्धा त्यांच्याबरोबर गेली. काही वेळाने ती एकटीच पुन्हा जलतरण तलावाकडे येऊन उडी मारली आणि ती पाण्याखाली गेली.

मात्र, तिच्याकडे कोणाचे लक्ष गेले नाही. ती पाण्यावर तरंगताना दिसली, तेव्हा एकच खळबळ उडाली. त्वरित या मुलीला हणजूण येथील सेंट अँथनी हॉस्पिटलमध्ये उपचारासाठी नेण्यात आले, परंतु डॉक्टरांनी तिला मृत घोषित केले. या घटनेची माहिती पोलिसांना इस्पितळातून देण्यात आली. त्यानंतर पुढील कारवाई पोलिसांनी केली. या प्रकरणाचा तपास उपनिरीक्षक साहिल वारंग करत आहे.