पणजी: सुरक्षिततेच्या दृष्टीने दाबोळी विमानतळ फनेल क्षेत्रातील अनधिकृत बांधकामे मानवी विचाराचा आधार घेऊन नियमित करण्यासाठी चिखली येथील 44 घरमालकांनी याचिका सादर केली होती. मुंबई उच्च न्यायालयाच्या गोवा खंडपीठाने ही याचिका फेटाळताना ते शक्य नसल्याचे निरीक्षण नोंदवले आहे.

विमानतळाच्या फनेल क्षेत्रात असलेली बांधकामे धोकादायक असल्याच्या याचिकेत गोवा खंडपीठाने निवाडा देताना या क्षेत्रातील सर्व बांधकामे हटवण्याचे निर्देश संबंधित अधिकाऱ्यांना दिले होते. फनेल क्षेत्रात कोणत्याही बांधकामांना परवानगी नसताना तेथे मोठमोठ्या इमारती तसेच अनधिकृत बांधकामे उभी राहत असल्याने अवमान याचिका सादर करण्यात आली होती. यावर खंडपीठाने दाबोळी येथील नौदल प्राधिकरणाची बाजू ऐकून घेतली होती. त्यांनी या क्षेत्रातील एकालाही परवानगी दिली नसल्याचे स्पष्ट केले होते.

दाबोळी विमानतळाच्या फनेल क्षेत्रात अळंबीप्रमाणे गेल्या काही वर्षांत अनधिकृत बांधकामे उभी राहिली आहेत. त्यातच गगनचुंबी इमारतींचीही बांधकामे उभी राहत असल्याने ते विमानांसाठी सुरक्षिततेच्या दृष्टीने धोकादायक आहे, अशी याचिका काही वर्षांपूर्वी गोवा खंडपीठात दाखल झाली होती.