Cuncolim Shantadurga Kunkalikarin Issue

श्री शांतादुर्गा कुंकळ्ळीकरीण संस्थान तसेच या संस्थानाच्या समितीच्या विरोधात श्रेया धारगळकर आणि इतरांनी आक्षेपार्ह व्हिडिओ व्हायरल करून भाविकांच्या धार्मिक भावना दुखावल्याचा दावा करून रस्त्यावर उतरलेल्या सुमारे 400 भाविकांविरोधात कुंकळ्ळी पोलिसांनी हमरस्ता अडवून वाहतुकीला अडथळा आणल्याबद्दल गुन्हा नोंद केला आहे.

या प्रकरणातील अन्य एक संशयित नमिता फातर्पेकर हिला नोटीस देण्यासाठी गेलेल्या महिला पोलीस शिपाई अस्मिता महाले हिला शिवीगाळ करून तिला चावल्याच्या आरोपाखाली मडगाव पोलीस स्थानकात आणखी एक गुन्हा नोंद केला आहे. सध्या फातर्पेकर हिला धार्मिक भावना दुखावल्याच्या आरोपाखाली कुंकळ्ळी पोलिसांनी अटक केली आहे.

20 मे रोजी शेकडो भाविकांनी श्रेया धारगळकर आणि अन्य संशयितांना पोलिसांनी अटक करावी यासाठी बाळ्ळी येथे राष्ट्रीय हमरस्ता 66 अडवून ठेवला होता. सुमारे अडीच तास त्यामुळे वाहतूक बंद झाली होती.

आता या प्रकरणात कुंकळ्ळी पोलिसांनी सुमारे 400 अज्ञात भाविकांविरोधात भादंसंच्या 143 (दंगा माजविणे), 341 (अडवणूक करणे), 431 (सार्वजनिक रस्त्यावर अडवणूक करणे) यासह 149 (जमाव करुन दंगल माजविणे) तसेच राष्ट्रीय हमरस्ता कायद्याच्या कलम 8 (ब) खाली गुन्हा नोंद केला आहे.

या प्रकरणी उपनिरीक्षक एस. वेळीप हे तपास करीत आहेत. महिला पोलीस शिपाई अस्मिता महाले यांना फातर्पेकर हिने शिविगाळ करून तिच्या हाताचा चावा घेतल्याच्या आरोपाखाली मडगाव पोलिसात गुन्हा नोंदविण्यात आला आहे.