मोरजी: मांद्रे मतदारसंघातील पाण्याची समस्या सोडवण्यासाठी ३० एमएलडी प्रकल्प तुये येथील आयटीआयजवळ उभारला जात आहे. हा प्रकल्प डिसेंबरपर्यंत कार्यान्वित करण्याचे प्रयत्न आहे. त्यासाठी सध्या जलवाहिन्यांचे जाळे विणले जात आहे. मात्र यासाठी रस्त्याच्या बाजूने केलेले खोदकाम या पावसाळ्यात पुन्हा अडचणीचे ठरणार अशी चिन्हे दिसत आहेत.

गेल्याच वर्षी रस्त्याच्या एका बाजूने भूमिगत वीज केबल घातलेले रस्ते व्यवस्थित बुजविले गेले नाहीत वा डांबरीकरणही केले गेले नाहीत. नोव्हेंबरपासून तुयेतील आयटीआय ते पार्से हॉस्पिटलपर्यंत दुसऱ्या बाजूने रस्ता खोदून जलवाहिनी टाकण्यात येत आहे,

मात्र जलवाहिनी घातल्यानंतर चर व्यवस्थित बुजविले गेले नाहीत. आता पार्सेचे माजी सरपंच अजित मोरजकर यांच्या निवासस्थानापासून रस्ते खोदण्यास सुरवात झाली आहे. चोपडे आगरवाडापर्यंत हे खोदकाम होणार आहे. तोवर पावसाळा लागणार असल्याने या रस्त्यांचे डांबरीकरण पावसाळ्यानंतरच करावे लागणार आहे. त्यामुळे पावसाळ्यात खोदकाम केलेल्या रस्त्यांवरून प्रवास करावा लागणार असल्याने वाहनचालक चिंता व्यक्त करीत आहेत. मागील पावसाळ्यातही रस्त्यांवरून प्रवास करताना मोठ्या अडचणींचा सामना करावा लागला होता.

खोदलेल्या रस्त्यांवर डांबराचे आवरण घालणार : आरोलकर

आमदार जीत आरोलकर यांच्याकडे संपर्क साधला असता, मांद्रे (Mandrem) मतदारसंघातील पुरवठा व्यवस्था सुधारण्यात येत आहे, तुयेत ८० कोटींपेक्षा जास्त खर्च करून पाणी प्रकल्प उभारला जात आहे. हा प्रकल्प डिसेंबरपर्यंत कार्यान्वित होईल. पण त्याआधी जलवाहिन्यांचे जाळे विणणे आवश्‍यक आहे, त्यानुसार हे कामही युद्ध पातळीवर सुरू आहे. पावसाळ्यात हे रस्ते धोकादायक बनू नये, यासाठी या रस्त्यांवर डांबराचे आवरण घातले जाईल. तसेच दिवाळीनंतर हॉटमिक्स डांबरीकरण केले जाईल. असे त्यांनी सांगितले.