Panjim News : गणेशोत्सवात मांडवी किनारी भरवल्या जाणाऱ्या अष्टमीच्या फेरीतून महापालिकेच्या तिजोरीत 30 लाख रुपयांचा महसूल जमा झाल्याची माहिती आयुक्त आग्नेल फर्नांडिस यांनी दिली. यंदा अष्टमी फेरीच्या नियोजनाचा बोजवारा उडाला होता. अर्जांच्या काळ्या बाजारामुळे महापालिकेचे नाव पुरते बदनाम झाले होते. गणेश चतुर्थीला दोन दिवस बाकी असताना अर्जांची विक्री करण्याचे काम महापालिकेने हाती घेतले.

ज्यांच्याकडे जबाबदारी दिली होती, त्यांच्याकडून काही लोकांनी अर्ज घेऊन त्यांच्या झेरॉक्स काढून त्यांची अव्वाच्या सव्वा रुपयांना विक्री केली होती. विशेष म्हणजे या काळात 15 हजार रुपयांना काहीजणांनी अर्ज काळ्या बाजाराने घेतले होते. ही बाब प्रसार माध्यमांमध्ये पोहोचल्याने अखेर आमदार बाबूश मोन्सेरात यांना त्यात लक्ष घालावे लागले. त्यांनी महापालिकेत येऊन अधिकाऱ्यांना खडे बोल सुनावले. त्यानंतर तत्काळ महापालिकेची सूत्रे हलली आणि अर्ज वेगळ्या रंगात छापून घेऊन त्या प्रक्रियेत बदल केला. त्यामुळे चारशेच्यावर दुकानांना फेरीत परवानगी मिळाली.

आयुक्त, अभियंत्यांचे कौशल्य

यंदा फेरीबोटीजवळील क्रूसपासून ते कला अकादमीच्या आऊट गेटपर्यंत व्यावसायिकांनी दुकाने थाटली. बारा दिवस राहिलेल्या या फेरीमुळे भाड्यापोटी महापालिकेला 30 लाखांवर महसूल मिळाला असल्याचे लेखापाल सिद्धेश देसाई यांनी सांगितले. कमी वेळेत आयुक्त फर्नांडिस, अभियंते विवेक पार्सेकर यांनी केलेल्या नियोजनामुळे पुन्हा व्यावसायिकांचा गोंधळ उडाला नाही, असेही त्यांनी नमूद केले.