Christmas tourists in Goa beach hotels

म्हापसा: बार्देशमधील कळंगुट, बागा, कांदोळी समुद्रकिनारे सध्या पर्यटकांनी फुलले आहेत. पुढील चार दिवसांत पर्यटकांच्या संख्येत अधिक वाढ होणार आहे.

किनाऱ्यावरील शॅकवर पर्यटकांची मोठी रेलचेल दिसते. अधिक भरणा हा देशी पर्यटकांचा आहे. पर्यटकांची गैरसोय होऊ नये, वाहतूक कोंडीवर नियंत्रण असावे याकरिता पोलिस पथक किनारी भागातील प्रत्येक चौकात तसेच रस्त्यावर दिसते. पोलिस कर्मचाऱ्यांकडून वाहतुकीचे व्यवस्थापन केले जात आहे. अनेक देशी पर्यटक आपली खासगी वाहने घेउन गोव्यात दाखल झाले आहेत.

पर्यटक आपल्या खासगी वाहनांसह रेंट-अ-बाईकद्वारे किनारी परिसरात फेरफटका मारताना दिसत आहेत. यापैकी बहुतेक नॉर-गिअर बाईक आहेत. त्यामुळे किनाऱ्याच्या दिशेने जाणाऱ्या रस्त्यांवर गर्दी तसेच वाहनांच्या रांगा लागत आहेत. देशी पर्यटकांमध्ये अधिकतर वाहने या कर्नाटक, आंध्र प्रदेश, तेलंगणा, गुजरात आदी नोंदणीकृत आहेत.