फोंडा: फोंड्याचे माजी आमदार तथा पोलिस खात्यातील सेवानिवृत्त पोलिस उपअधीक्षक लवू मामलेदार यांच्या मृत्युप्रकरणी बेळगाव पोलिसांनी २०० पानांचे आरोपपत्र दाखल केले आहे. आरोपपत्रात संशयित रिक्षाचालक आमिर सुहेल सनदी (२५) याच्याविरुद्ध खुनाचा गुन्हा दाखल केला आहे.

शवचिकित्सा अहवालात लवू मामलेदार यांचा मृत्यू मानसिक तणावाखाली हृदयविकारचा झटका आल्याने झाल्याचे समोर आले होते. यानंतर संशयित रिक्षाचालक अमीरसुहेल याच्याविरोधात खुनाचा खटला दाखल करण्याची मागणी केली जात होती. अखेर बेळगाव पोलिसांनी दोन महिन्यांच्या तपासानंतर बेळगाव न्यायालयात आरोपपत्र दाखल केले आहे.

गेल्या १५ फेब्रुवारीला माजी आमदार लवू मामलेदार हे बेळगावात गेले असता रिक्षाचालक आमिर आणि लवू मामलेदार यांच्यात शाब्दिक बाचाबाची झाली होती. त्यावेळी प्रकरण मारहाणीपर्यंत पोचल्यावर लवू मामलेदार हे खाली कोसळून गतप्राण झाले होते. त्यावेळी आमिर याला बेळगाव पोलिसांनी ताब्यात घेऊन अटक केली होती.

लवू मामलेदार कर्तव्यदक्ष अधिकारी म्हणून प्रसिद्ध होतेच शिवाय कार्यदक्ष आमदार म्हणून देखील त्यांचा लौकिक होता. दरम्यान, बेळगावमध्ये कामानिमित्त वारंवार त्यांचे जाणं येणं व्हायचं. १५ फेब्रुवारी रोजी त्यांच्या कारचा रिक्षाला किरकोळ धक्का लागला, याबाबत त्यांनी माफी देखील मागितली. पण, रिक्षाचालकाने त्यांना धक्काबुक्की केली. मामलेदार हॉटेलमध्ये जात असताना रिसेप्शनजवळ कोसळले आणि त्यांचा दुर्दैवी अंत झाला.