Goa Accident : ऐन सणासुदीत गोव्यात पुन्हा एकदा अपघातांचं सत्र सुरु झालं आहे. साखळीजवळच असलेल्या विठ्ठलापूर परिसरात मॅगी घेऊन जाणारा कंटेनर कलंडल्याची घटना ताजी असतानाच अवघ्या 12 तासांमध्ये गुळे काणकोणमध्ये बांबू घेऊन जाणाऱ्या ट्रकचा भीषण अपघात झाला आहे. या अपघातामध्ये एकाचा बळी गेल्या असून 6 ते 7 जण जखमी झाले आहेत. त्यामुळे चतुर्थीच्या तोंडावर गोव्यात रस्ते सुरक्षिततेचा प्रश्न पुन्हा एकदा ऐरणीवर आला आहे.

गुळे काणकोण येथे बांबूंनी भरलेला ट्रक कलंडल्याने झालेल्या अपघातात एका 32 वर्षीय कामगाराचा मृत्यू झाला. हा कामगार आसाम येथील असून तो बांबूंच्या ढिगाऱ्याखाली अडकला होता. अग्निशमन दलाच्या जवानांनी त्याचा मृतदेह बाहेर काढला. मिळालेल्या माहितीनुसार या ट्रकात चालक व वाहक यांच्यासह एकूण 9 जण होते. त्यापैकी सात कामगार ट्रकच्या हौदात होते. त्यातील 5 किरकोळ जखमी झाले तर एक गंभीर जखमी झाला.

साखळीजवळ असलेल्या विठ्ठलापूर परिसरात सोमवारी संध्याकाळी कंटेनरचा भीषण अपघात झाला आहे. हा कंटेनर आधी विजेच्या खांबाला धडकला आणि त्यानंतर रस्त्याशेजारी असलेल्या घरावर कोसळला. या अपघातात चालकाला किरकोळ इजा झाली आहे.

याबाबत मिळालेल्या प्राथमिक माहितीनुसार, डिचोलीजवळील नेस्ले कंपनीतून हा कंटेनर मॅगी घेऊन निघाला होता. मात्र सर्वण विठ्ठलापूरजवळ पोहोचताच चालकाचं कंटेनरवरील नियंत्रण सुटलं. हा कंटेनर आधी रस्त्याशेजारी असलेल्या विजेच्या खांबाला धडकला आणि त्यानंतर एका घरावर कोसळला. अपघातात चालकाला किरकोळ इजा झाली असून घराचं मात्र मोठं नुकसान झालं आहे.