Sasashti News :
सासष्टी, डॉ. फ्रान्सिस लुईस गोम्स हे थोर बुद्धिमान होते. त्याच बरोबर ते साहित्यिक, अर्थतज्ञ, इतिहासकार व राजकारणीसुद्धा होते. त्यांच्या अष्टपैलू व्यक्तिमत्वाचा आम्हाला अभिमान वाटायला हवा.

त्यांनी देशाच्या स्वांतत्र्यासाठी मोठे योगदान दिले, असे उद्‍गार दक्षिण गोव्याचे जिल्हाधिकारी आश्र्विन चंद्रू (आयएएस) यांनी डॉ. फ्रान्सिस लुईस गोम्स यांच्या १९५ व्या जयंतीदिनी काढले.

नावेली - मडगाव येथील डॉ. फ्रान्सिस लुईस गोम्स ट्रस्टने उभारलेल्या त्यांच्या पुतळ्याला फुलांचा हार अर्पण करून त्यांना श्रद्धांजली वाहण्यात आली. प्रथमच हा कार्यक्रम शासकीय स्तरावर आयोजित करण्यात आला.

यंदा आचारसंहितेमुळे या कार्यक्रमाचे स्वरूप मोठ्या प्रमाणात करता आले नाही, पण पुढील वर्षी हा कार्यक्रम चांगल्या पद्धतीने आयोजित केला जाईल, असे आश्वासन जिल्हाधिकाऱ्यांनी याप्रसंगी दिले.