Goa Crime News : पिळर्ण येथील एका परदेशी नागरिक महिलेचा मोबाईल हिसकावणाऱ्या एका संशयितास पर्वरी पोलिसांनी अटक केली आहे. यावेळी संशयिताकडून 1 लाख 20 हजारांचा मोबाईल हस्तगत करण्यात आला. पर्वरी पोलिस पुढील तपास करीत आहेत.

याबाबत अधिक माहिती अशी की, परदेशी नागरिक महिला व तिचे पती पिळर्ण ते बेती प्रवास करीत होते. प्रवासादरम्यान डिव्हो दुचाकीवरुन आलेल्या एका युवकाने महिलेच्या हातातील फोन हिसकावून घेतला व पसार झाला.

याबाबतची तक्रार इस्रायल नागरिकाने पोलिसांत नोंदविली. विश्वसनिय सूत्रांनी दिलेल्या माहितीच्या आधारे पोलिसांनी संशयितावर तांत्रिक पाळत ठेवत आज अटक केली. तौफिक शेख, (19) रा. पैठण, बार्देश असे अटक करण्यात आलेल्या संशयिताचे नाव आहे. यावेळी संशयिताकडून 1 लाख 20 हजारांचा मोबाईल हस्तगत करण्यात आला.

सदर कारवाई पर्वरीचे उपविभागीय पोलीस अधिकारी विद्वेश कर्पे, पीआय अनंत गावकर, पीएसआय सीताराम मलिक, पीएसआय प्रतीक भाटप्रभू, कॉन्स्टेबल नितेश गौडे, सिद्धेश नाईक आणि योगेश शिंदे यांनी केली.