साळ: डिचोली तालुक्यातील साळ येथे शुक्रवारी (ता. ४) मध्यरात्री १२.३० वाजण्याच्या सुमारास ‘म्हालकुम भाटले’ जमीन क्षेत्रात मुसळधार पाऊस व सोसाट्याच्या वाऱ्यामुळे एका झाडाच्या फांद्या वीजतारांवर कोसळून एक वीजखांब मोडला व वीजतारा तुटल्याने खालचावाडा - साळ येथील नागरिकांना तब्बल १५ तास विजेविना काढावे लागले.

त्या दिवशी रात्री वीज खंडित होण्याचे कारण ग्रामस्थांना कळले. त्यानंतर वीज खात्याला दूरध्वनीवरून संपर्क साधल्यानंतर रात्री दोनच्या सुमारास वीज कर्मचाऱ्यांनी घटनास्थळी येऊन पाहणी केली, पण रात्री वीज खांबावरील तुटलेल्या वीजवाहिन्यांची दुरुस्ती करणे शक्य नसल्याने ते माघारी फिरले.

दुसऱ्या दिवशी सकाळी अकरा वाजता वीज खात्याचे कर्मचारी घटनास्थळी पोचल्यावर मोडलेला खांब काढून नवीन खांब उभा केला व वीजतारा जोडून वीजप्रवाह सुरू करेपर्यंत संध्याकाळचे ३.३० वाजले. त्यानंतर वीजपुरवठा सुरू झाला.

विजेबाबत साळ हा गाव गोव्याच्या पटलावर सुस्थितीत आहे, पण गावातील चित्र वेगळेच आहे. येथे वीज उपकेंद्र आहे, पण पुरेसा कर्मचारीवर्ग नाही. छोट्या छोट्या कामांना कासारपाल येथील वीज कार्यालयाशी संपर्क साधावा लागतो, पण तेथील कर्मचारी वर्गाला क्षेत्र मोठे असल्याने ते वेळेवर पोहोचू शकत नाहीत. भूमिगत केबलयुक्त गाव पण अजून ठिकठिकाणी खांबावर लोंबकळणाऱ्या वीजवाहिन्या दिसतात. वारंवारच्या खंडित वीजपुरवठ्यामुळे नागरिक त्रस्त बनले आहेत.

ताळगावातही विजेचा लपंडाव

शनिवारी रात्रभर ताळगाव परिसरात विशेषत: दुर्गावाडी, मार्केट परिसरात विजेचा लपंडाव सुरू होता. पावसाची उघडझाप सुरू होती. त्यातच सोसाट्याच्या वाऱ्यामुळे रात्री अनेकदा वीज खंडित होत होती. त्रस्त नागरिकांनी वीज खात्याच्या कार्यालयाशी संपर्क साधला. मात्र, फोन उचलला जात नसल्याने नागरिकांनी संताप व्यक्त केला.