Goa Fraud Case: प्रोजेक्टमध्ये गुंतवणूक करण्याचे आमिष दाखवून गोव्यातील एकाची कोट्यवधींची फसवणूक करण्यात आली. याप्रकरणी मायणा-कुडतरी पोलिसांनी केरळमधील दोघांविरोधात गुन्ह्याची नोंद केली. आर्ले-राय येथील रामचंद्र तोपले यांची 1.32 कोटी रुपयांची फसवणूक करण्यात आली. पोलिसांनी या दोघांविरोधात भारतीय न्याय संहिता (BNS) च्या कलम 318(3) सह कलम 3(5) अंतर्गत गुन्हा दाखल केला. हफसाथ बीवी थाचोली थाझे कुनुयिल आणि हकीम. के अशी आरोपींची नावे आहेत. हे दोघेही केरळमधील कोझिकोड येथील रहिवासी आहेत.

नेमंक प्रकरण काय?

दरम्यान, या प्रकरणातील तक्रारदार रामचंद्र तोपले यांना त्यांच्या "ए कोर दे राय" (A Cor De Raia) नावाच्या प्रोजेक्टमध्ये गुंतवणूक करण्याचे आमिष दाखवण्यात आले. आरोपींनी तोपले यांचा विश्वास संपादन केला आणि त्यांच्या प्रोजेक्टमध्ये गुंतवणूक करण्याचे खोटे आश्वासन दिले. या आश्वासनामुळे तोपले यांनी आरोपींवर विश्वास ठेवून त्यांना वेगवेगळ्या टप्प्यांमध्ये तब्बल 1 कोटी 32 लाख रुपये दिले. ही रक्कम आरोपींनी तोपले यांच्याकडून फसवणुकीने घेतली. मात्र ठरल्याप्रमाणे गुंतवणूक न करता आरोपींनी तोपले यांना कोट्यवधींचा चुना लावला. आपली फसवणूक झाल्याचे लक्षात येताच रामचंद्र तोपले यांनी मायणा कुडतरी पोलीस ठाण्यात धाव घेऊन तक्रार दाखल केली.

पुढील तपास सुरु

तक्रार दाखल झाल्यानंतर पोलिसांनी तातडीने गुन्हा दाखल करुन तपास सुरु केला. सध्या मायणा कुडतरी पोलीस ठाण्याचे पीएसआय (PSI) गौरव नाईक हे या संपूर्ण प्रकरणाचा पुढील तपास करत आहेत. आरोपी केरळचे रहिवासी असल्याने आणि फसवणुकीची रक्कम मोठी असल्याने पोलिस या प्रकरणाचा कसून तपास करत आहेत.