पणजी: उसगाव येथे गुन्हे शाखेने मोठी कारवाई करत बनावट दारू उत्पादन व वितरण रॅकेटचा पर्दाफाश केला होता. पहिल्या छाप्यात चार जणांना अटक करण्यात आली होती. तसेच १.५ कोटी रुपयांचा बनावट दारू साठा जप्त केला होता.

याप्रकरणी आणखी तीन जणांना अटक करण्यात आली असून, सर्व आरोपी आता पोलीस कोठडीत असल्याची माहिती पोलिसांनी दिली आहे. पोलीस निरीक्षक लक्षी आमोणकर यांच्या नेतृत्वाखालील पथकाने धवशिरे, तिस्क, उसगाव येथील ‘तेजा ऑटो सर्विस स्टेशन’च्या मागील

गोदामावर छापा टाकला होता. येथे मोठ्या प्रमाणावर बनावट दारू तयार करून साठवली जात असल्याचे उघड झाले होते. राजस्थान व गुजरातमधील चार जणांना यावेळी ताब्यात घेण्यात आले होते.

दरम्यान, याप्रकरण आतापर्यंत ७ जणांना अटक करण्यात आली आहे. यामध्ये पहिल्या कारवाईत गोविंदसिंह राजपूत (२४), मुकेश आदिवासी (५०) महेंद्रसिंह राजपूत (२४), प्रकाश मीना (२८) आणि दुसऱ्या कारवाईत करणसिंग राजपूत (४२), मुनाफ शेख (४२), सावंतवाडी, भरत राठोड (२५) यांना अटक करण्यात आली.