पणजी: विनू मांकड करंडक १९ वर्षांखालील मुलांच्या एकदिवसीय क्रिकेट स्पर्धेत गोव्याला अखेरच्या गटसाखळी लढतीतही पराभव पत्करावा लागला. गुजरातने ११६ धावांनी दणदणीत विजय संपादला. एलिट अ गट सामना शुक्रवारी हरियानातील सुलतानपूर येथील गुरुग्राम क्रिकेट मैदानावर झाला.

गोव्याचा हा पाच लढतीतील चौथा पराभव ठरला. फक्त एका विजयामुळे त्यांना चार गुण मिळाले. शुक्रवारी गुजरातने नाणेफेक जिंकून प्रथम फलंदाजी स्वीकारली. निर्धारित ५० षटकांत त्यांनी ७ बाद २९५ धावा केल्या.

गोव्याला हे आव्हान पेलवले नाही. सलामीचा आदित्य कोटा (५४ धावा, ९० चेंडू, ५ चौकार, २ षटकार) व कर्णधार यश कसवणकर (६७ धावा, ८२ चेंडू, ४ चौकार, २ षटकार) यांच्या अर्धशतकांनंतरही गोव्याचा डाव ४३.३ षटकांत १७९ धावांत संपुष्टात आला. आदित्य व यश यांनी तिसऱ्या विकेटसाठी ९१ धावांची भागीदारी केली.

संक्षिप्त धावफलक

गुजरात ः ५० षटकांत ७ बाद २९५ (मानस दवे ७५, मौल्यराजसिंग चावडा ८५, वेदांत त्रिवेदी नाबाद ८०, समर्थ राणे ९-१-४९-३, चिगुरुपती व्यंकट १०-०-७२-१, यश कसवणकर १०-०-५७-१, शिवेन बोरकर १०-०-५२-१, जय कांगुरी ५-०-३५-०, आराध्य गोयल ६-०-२३-१)

वि. वि. गोवा ः ४३.३ षटकांत सर्वबाद १७९ (आदित्य कोटा ५४, अभियश सूर्यवंशी १, शंतनू नेवगी १३, यश कसवणकर ६७, दिशांक मिस्कीन ४, आराध्य गोयल ०, नितीन घाडी ०, चिगुरुपती व्यंकट २५, शिवेन बोरकर १, समर्थ राणे ०, जय कांगुरी नाबाद ०, वासू देवानी ३-२१, काव्य पटेल २-२३, मीत पटेल २-३१, खिलन पटेल २-२८).