जयपूर: विजय हजारे राष्ट्रीय एकदिवसीय क्रिकेट स्पर्धेत मुंबईने आपली विजयी घोडदौड कायम राखताना आज झालेल्या सामन्यात गोवा संघाचा ८७ धावांनी पराभव केला आणि सलग चौथा विजय मिळवला.

मुंबईने प्रथम फलंदाजीत ५० षटकांत ४४४ धावांचा मोठा डोंगर उभा केला; परंतु गोवा संघानेही प्रतिकार करून नऊ बाद ३५७ धावांपर्यंत मजल मारली.

मुंबईकडून सर्फराझ खानने तुफानी दीडशतकी खेळी केली. ७५ चेंडूंत १५७ धावा करताना त्याने तब्बल १४ षटकार मारले. याव्यतिरिक्त नऊ चौकारांचीही पेरणी केली. सर्फराझचा भाऊ मुशीर खानने ६० तर हार्दिक तामोरेने २८ चेंडूंतच ५३ धावांचा तडाखा दिला.

देशांतर्गत क्रिकेटमध्ये ४४५ धावांचे लक्ष्य पार झालेले नाही, तरीही गोवा संघाने चार बाद १२० अशी परिस्थिती झालेली असतानाही प्रतिकार सोडला नाही. मूळचा दिल्लीकर असलेल्या या गोवा संघातून खेळणाऱ्या ललित यादवने ६४ धावांची खेळी केली; परंतु लक्षवेधक प्रतिकार केला तो अभिनव तेजराणा याने. त्याने ७० चेंडूंतच १०० धावा फटकावल्या. ललित आणि अभिनव यांनी १०३ चेंडूंत ११७ धावांची भागीदारी केली. त्यानंतर कर्णधार दीपराज गावकरने तर २८ चेंडूंत ७० धावांचा तडाखा दिला.

मुंबई कर्णधार शार्दुल ठाकूरने स्वतःसह सात गोलंदाज वापरले, यात यशस्वी जयस्वालला तीन षटके गोलंदाजी दिली आणि जयस्वालने त्यात ५२ धावा दिल्या असल्या तरी दोन विकेट मिळवल्या. अभिनव आणि दीपराज या दोघांना त्याने बाद केले.

संक्षिप्त धावफलक : मुंबई ः ५० षटकांत ८ बाद ४४४ (यशस्वी जयस्वाल ४६- ६४ चेंडू, ६ चौकार, मुशीर खान ६०-६६ चेंडू, ५ चौकार, २ षटकार, सर्फराझ खान १५७- ७५ चेंडू, ९ चौकार, १४ षटकार, शार्दुल ठाकूर २७, हार्दिक तामोरे ५३- २८ चेंडू, ६ चौकार, २ षटकार, शम्स मुलानी २२, तनुष कोटियन नाबाद २३, अर्जुन तेंडुलकर ८-०-७८-०, वासुकी कौशिक १०-२-६०-२, दीपराज गावकर ७-०-५७-१, शुभम तारी ७-०-५२-०, दर्शन मिसाळ ९-०-९८-३, ललित यादव ९-०-९३-२) वि. वि. गोवा ः ५० षटकांत ९ बाद ३५७ (अर्जुन तेंडुलकर २४, कश्यप बखले २१, स्नेहल कवठणकर २७, सुयश प्रभुदेसाई ३१, ललित यादव ६४- ६६ चेंडू, ३ चौकार, २ षटकार, अभिनव तेजराणा १००- ७० चेंडू, ५ चौकार, ८ षटकार, दीपराज गावकर ७०- २८ चेंडू, ४ चौकार, ७ षटकार, राजशेखर हरिकांत ८, दर्शन मिसाळ १, वासुकी कौशिक नाबाद ०, शुभम तारी नाबाद ०, शार्दुल ठाकूर ६-०-२०-३, यशस्वी जयस्वाल ३-०-५२-२).