पणजी: रणजी करंडक क्रिकेटमध्ये गतमहिन्यात मध्य प्रदेशने गोव्याच्या तोंडचा विजयाचा घास हिरावून घेतला होता, त्याचा बदला मंगळवारी कोलकाता येथे घेण्यात आला. याकामी कर्णधार सुयश प्रभुदेसाई (नाबाद ७५) व अभिनव तेजराणा (५५) यांची अर्धशतके निर्णायक ठरली.

सय्यद मुश्ताक अली करंडक टी-२० क्रिकेट स्पर्धेतील एलिट ब गट सामन्यात गोव्याने दणकेबाज खेळ करताना मध्य प्रदेशला सात विकेट आणि नऊ चेंडू राखून आरामात हरविले. सामना सॉल्ट लेक-कोलकाता येथील जेयू सेकंड कँपस मैदानावर झाला. गोव्याचा हा चार सामन्यांतील दुसरा विजय असून त्यांचे आठ गुण झाले आहेत. स्पर्धेतील दुसऱ्या पराभवामुळे मध्य प्रदेशचे आठ गुण कायम राहिले.

गोव्यासमोर विजयासाठी १७१ धावांचे लक्ष्य होते. तीन षटकांत दोन्ही सलामी फलंदाजांना गमावल्यानंतर अभिनव व सुयश यांनी संयम आणि आक्रमकतेचा सुरेख संगम साधत गोव्याला मजबूत स्थिती गाठून दिली. विजयासाठी ३६ चेंडूंत ५७ धावांची गरज असताना अभिनव बाद झाल्यामुळे तिसऱ्या विकेटची ८९ धावांची भागीदारी संपुष्टात आली. डावखुऱ्या फलंदाजाने ३३ चेंडूंचा सामना करताना तीन चौकार व चार षटकार मारले.

नंतर सुयशने ललित यादव (नाबाद १२) याच्या साथीत १.३ षटके बाकी राखून गोव्याला विजय मिळवून दिले. कर्णधारास साजेशी खेळी करताना सुयशने ५० चेंडूंत सहा चौकार व तीन षटकार मारले. तोच सामन्याचा मानकरी ठरला. त्यापूर्वी, गोव्याने नाणेफेक जिंकून मध्य प्रदेशला प्रथम फलंदाजीस पाचारण केले.

हरप्रीतसिंग भाटिया याच्या आक्रमक नाबाद ८० धावांमुळे चौथ्या षटकातील ३ बाद १० अशा स्थितीतून मध्य प्रदेशने ६ बाद १७० धावांची मजल मारली. हरप्रीतने कर्णधार रजत पाटीदार (२९) याच्यासमवेत चौथ्या विकेटसाठी ७३ धावांची भागीदारी केली. डावाच्या अंतिम टप्प्यात अनिकेत वर्मा याने एक चौकार व चार षटकारांसह १३ चेंडूंत केलेल्या आक्रमक ३४ धावा मध्य प्रदेशसाठी महत्त्वपूर्ण ठरल्या. हरप्रीतने ५२ चेंडूंचा सामना करताना आठ चौकार व दोन षटकार मारले.

संक्षिप्त धावफलक

मध्य प्रदेश : २० षटकांत ६ बाद १७० (हरप्रीतसिंग भाटिया नाबाद ८०, रजत पाटीदार २९, अनिकेत वर्मा ३४, अर्जुन तेंडुलकर ४-०-३६-३, वासुकी कौशिक ४-०-२२-१, हेरंब परब ३-०-२७-२, दीपराज गावकर ४-०-३०-०, दर्शन मिसाळ २-०-२३-०, ललित यादव ३-०-२४-०) पराभूत वि. गोवा : १८.३ षटकांत ३ बाद १७१ (ईशान गडेकर ५, अर्जुन तेंडुलकर १६, अभिनव तेजराणा ५५, सुयश प्रभुदेसाई नाबाद ७५, ललित यादव नाबाद १२, त्रिपुरेश सिंग ३-०-२७-१, व्यंकटेश अय्यर ३-०-३५-१, राहुल बाथम ३.३-०-३४-१).