पणजी: एफसी गोवासमोर यावेळेस सुपर कप विजेतेपद राखण्याचे आव्हान असेल. त्यांच्या गटात गतउपविजेता जमशेदपूर एफसी, ड्युरँड कप विजेता नॉर्थईस्ट युनायटेड, आय-लीग विजेता इंटर काशी आदी मातब्बर संघ आहेत.

अखिल भारतीय फुटबॉल महासंघाने (एआयएफएफ) गुरुवारी स्पर्धेची गटवारी जाहीर केली. स्पर्धा येत्या २५ ऑक्टोबरपासून गोव्यात नियोजित असून सामने फातोर्डा येथील पंडित जवाहरलाल नेहरू स्टेडियम व बांबोळी ॲथलेटिक्स स्टेडियमवर होतील. स्पर्धेत १६ संघांचा समावेश असून त्यांची चार गटात विभागणी करण्यात आली आहे. इंडियन सुपर लीग (आयएसएल) स्पर्धेतील १२, तर आय-लीग स्पर्धेतील चार संघ स्पर्धेत खेळतील.

गतमोसमात (२०२४-२५) ओडिशातील भुवनेश्‍वर येथे सुपर लीग स्पर्धेतील अंतिम लढतीत एफसी गोवाने जमशेदपूर एफसीला ३-० फरकाने नमवून विजेतेपद पटकावले होते, तसेच एएफसी चँपियन्स लीग दोन फुटबॉल स्पर्धेच्या प्ले-ऑफ फेरीसाठी पात्रता मिळविली होती. एआयएफएफनुसार, यावेळचा सुपर कप विजेता संघही एएफसी चँपियन्स लीग दोन प्ले-ऑफसाठी पात्र ठरेल.

एफसी गोवाचा यावेळच्या सुपर कपमध्ये ब गटात, तर आयएसएल विजेता मोहन बागान सुपर जायंट्स संघ अ गटात आहेत. हे दोन्ही संघ सध्या एएफसी चँपियन्स लीग दोन स्पर्धेत भारताचे प्रतिनिधित्व करत आहेत. या स्पर्धेच्या ड गटातील पहिल्या लढतीत मानोलो मार्केझ यांच्या मार्गदर्शनाखालील एफसी गोवास इराकच्या अल झावरा क्लबविरुद्ध दोन गोलने हार पत्करावी लागली होती, त्यांचा पुढील सामना १ ऑक्टोबर रोजी ताजिकिस्तानमधील हिसोर येथे एफसी इस्तिक्लोल क्लबविरुद्ध होईल.

सुपर कप २०२५-२६ गटवारी

अ गट : मोहन बागान सुपर जायंट्स, चेन्नईयीन एफसी, ईस्ट बंगाल, रियल काश्‍मीर.

ब गट : एफसी गोवा, जमशेदपूर एफसी, नॉर्थईस्ट युनायटेड, इंटर काशी एफसी.

क गट : बंगळूर एफसी, मोहम्मेडन स्पोर्टिंग, पंजाब एफसी, गोकुळम केरळा एफसी.

ड गट : मुंबई सिटी एफसी, केरळा ब्लास्टर्स, हैदराबाद एफसी, राजस्थान युनायटेड.