पणजी: गोव्याच्या २३ वर्षांखालील क्रिकेट संघाने अखेरच्या सहा विकेट ५५ धावांत गमावल्या, परिणामी त्यांना स्टेट ए करंडक एकदिवसीय सामन्यांच्या क्रिकेट स्पर्धेत झारखंडकडून १५ धावांनी पराभव पत्करावा लागला.

एलिट ब गटातील सामना शनिवारी बडोदा येथील जीएसएफसी मैदानावर झाला. नाणेफेक जिंकून गोव्याने झारखंडला प्रथम फलंदाजीस पाचारण केले. त्यांनी पाच बाद १३६ वरून सर्वबाद २६९ धावांपर्यंत मजल मारली.

गोव्यातर्फे कुतबुदिन जमादार याने ५५ धावांत ४ गडी बाद केले. नंतर विजयासाठी २७० धावांची आवश्यकता असताना गोव्याने ४ बाद १९९ वरून पराभव ओढवून घेताना सर्वबाद २५४ धावा केल्या. कर्णधार शिवेंद्र भुजबळ (६९) व आर्यन नार्वेकर (५३) यांची पाचव्या विकेटची ११९ धावांची भागीदारी संपुष्टात आल्यानंतर गोव्याचा डाव गडगडला. झारखंडच्या अमित कुमार याने ३७ धावांत ४ गडी टिपले. गोव्याचा चार लढतींतील तिसरा पराभव ठरला.

संक्षिप्त धावफलक : झारखंड : ४९.३ षटकांत सर्वबाद २६९ (यश भगत ३७, राजन दीप ४१, रवी शर्मा ७०, शुभ शर्मा ३४, तनिश नाबाद २९, विनायक कुंटे १०-१-६३-१, कुतबुदिन जमादार ९.३-१-५५-४, मनीष काकोडे ६-०-३८-१, जीवनकुमार चित्तेम ४-०-२३-१) वि. वि. गोवा : ४८ षटकांत सर्वबाद २५४ (वीर यादव ४४, शिवेंद्र भुजबळ ८९, आर्यन नार्वेकर ५३, कुतबुदिन जमादार ८, अमित कुमार ९-१-३७-४).