Goa Vs Nagaland Ranji Trophy Cricket Match

पणजी: तुलनात्मकदृष्ट्या विचार करता रणजी करंडक प्लेट विजेतेपदासाठी गोव्याचे पारडे जड आहे, पण नागालँडकडेही साफ दुर्लक्ष करता येणार नाही. पाच दिवसीय अंतिम सामना गुरुवारपासून (ता. २३) सोविमा येथील नागालँड क्रिकेट स्टेडियमवर खेळला जाईल.

दर्शन मिसाळच्या नेतृत्वाखालील गोव्याने रणजी करंडक प्लेट विभागीय फेरीत सर्व पाचही सामने जिंकताना तुलनेत कमजोर प्रतिस्पर्ध्यांवर वर्चस्व राखले. मात्र विजयी वाटचालीत गतवर्षी ऑक्टोबरच्या अखेरीस नागालँडनेच त्यांना विजयासाठी झुंजविले होते. दर्शन व राहुल मेहता यांची फिरकी दुसऱ्या डावात वरचढ ठरल्यामुळे गोव्याने सामना ८३ धावांनी जिंकला होता. राँगसेन जोनाथन याच्या नेतृत्वाखालील नागालँडने यंदाच्या प्लेट गटात पाचपैकी तीन सामने जिंकून दुसरा क्रमांक मिळविला होता.

गोव्यासह नागालँड संघ २०२५-२६ मोसमातील रणजी करंडक क्रिकेट स्पर्धेच्या एलिट विभागात खेळण्यासाठी पात्र ठरला आहे. नागालँडने प्रथमच एलिट गटासाठी पात्रता मिळविली आहे. घरच्या मैदानावर विजयी कामगिरीसाठी ते इच्छुक असतील, मात्र तुलनेत जास्त अनुभवी असलेल्या गोव्याचे आव्हान त्यांच्यासाठी खडतर असेल.

तेंडुलकर जायबंदी; अमूल्यला संधी

तीन फिरकी गोलंदाजांसह गोव्याने मैदानात उतरण्याचे ठरविल्यास डावखुरा फिरकी गोलंदाज अमूल्य पांड्रेकर फेब्रुवारी २०२२ नंतर प्रथमच रणजी सामना खेळेल. अमूल्यने आतापर्यंत २८ रणजी सामन्यांत ५२ गडी बाद केले आहेत. प्राप्त माहितीनुसार, डावखुरा वेगवान गोलंदाज अर्जुन तेंडुलकर पूर्ण तंदुरुस्त नसून वेगवान गोलंदाजीची धुरा फेलिक्स आलेमाव व हेरंब परब यांच्या खांद्यावर असेल. सलामीचा रोहन कदमही अंतिम अकरा सदस्यीय संघात खेळण्याची शक्यता आहे. सुयश प्रभुदेसाई, के. व्ही. सिद्धार्थ, स्नेहल कवठणकर, दर्शन मिसाळ, समर दुभाषी, कश्यप बखले, मोहित रेडकर हे संघातील अन्य खेळाडू असू शकतील.