Goa Professional League 2024

पणजी: गोवा प्रोफेशनल लीग फुटबॉल स्पर्धेत ओळीने चार सामने गमावल्यानंतर माजी विजेत्या चर्चिल ब्रदर्सने सोमवारी भरपाई वेळेतील गोलमुळे पहिल्या विजयाची चव चाखली. त्यांनी कुठ्ठाळी व्हिलेजर्सला ३-२ असे निसटते हरविले. सामना म्हापसा येथील धुळेर स्टेडियमवर झाला.

सामन्यातील अखेरची काही मिनिटे संघर्षपूर्ण ठरली. ५६व्या मिनिटास लुनमिन्लेन हाओकिप याने चर्चिल ब्रदर्ससाठी पहिला गोल केला. नंतर ८५व्या मिनिटास स्टेन्डली फर्नांडिसने आघाडी २-० अशी भक्कम केली.

मात्र कुठ्ठाळी व्हिलेजर्सने प्रतिकार करताना रोनिल आझावेदो याने ८७व्या, तर व्हेलरॉय कार्व्हालो याने ९०+७व्या मिनिटास केलेल्या गोलमुळे २-२ अशी बरोबरी साधली. बदली खेळाडू ॲश्ली कोली याने ९०+८व्या मिनिटास केलेल्या गोलमुळे चर्चिल ब्रदर्सने विजय प्राप्त केला.

चर्चिल ब्रदर्सचे आता पाच लढतीतून तीन गुण झाले आहेत, तर दुसऱ्या पराभवामुळे कुठ्ठाळी व्हिलेजर्सने पाच लढतीनंतर पाच गुण कायम राहिले.