Goa Boxing Club-पणजी: इंडियन बॉक्सिंग काऊंसिलचा (आयबीसी) पश्चिम विभागातील फिदरवेट गटातील विजेता गोव्याचा बॉक्सर प्रल्हाद पांडा याच्यासमोर किताब राखण्याचे आव्हान आहे.

२८ जून रोजी मिरामार येथील क्लब टेनिस द गास्पार डायस येथे होणाऱ्या सुसेगादो स्ट्राईक फाईट नाईट-३ मध्ये तो बॉक्सिंग रिंगमध्ये आव्हानवीरास सामोरा जाईल.

प्रल्हाद २९ वर्षीय असून बस्तोडा येथील आहे. त्याला फिदरवेट बेल्टसाठी पुण्यातील २७ वर्षीय अमित कुमार आव्हान देईल. ``माझी कर्मभूमी असलेल्या गोव्यात होणाऱ्या लढतीत किताब राखणे माझ्यासाठी खूपच महत्त्वाचे आहे. मी नक्कीच संधी साधणार,`` असा विश्वास प्रल्हाद याने व्यक्त केला. प्रल्हादची आगामी लढत आठ फेऱ्यांची असेल.

सुसेगादो स्ट्राईक फाईट नाईट-३ मध्ये गोव्यातील अन्य एक बॉक्सरही रिंगमध्ये उतरणार आहे. चिंबल येथील तीस वर्षीय कैलास गावस मुंबईतील विरार येथील २२ वर्षीय प्रसाद कटनूर याच्याविरुद्ध लढेल. या स्पर्धेत देशभरातील एकूण १२ बॉक्सरमध्ये चुरस असेल. चार महिला बॉक्सरचाही या स्पर्धेत सहभाग आहे. महिलांच दोन लढती होतील.