Rapid Ranking Chess Tournament Winner Nitish Belurkar

पणजी: गोव्याचा इंटरनॅशनल मास्टर (आयएम) नितीश बेलुरकर याने पुण्यात झालेल्या श्री महेश्वरानंद सरस्वती स्मृती खुल्या रॅपिड मानांकन बुद्धिबळ स्पर्धेत विजेतेपद पटकावले. स्पर्धेत भारतासह इस्त्राईल, जर्मनी, अमेरिका, नेदरलँड्समधील मिळून ४४६ बुद्धिबळपटू सहभागी झाले होते.

नितीशने नऊ फेऱ्यांच्या या स्पर्धेत अपराजित राहताना साडेआठ गुणांची कमाई केली. शिवाय त्याने २८ फिडे मानांकन गुणांचीही प्राप्ती केली. फिडे मास्टर आकाश दळवी व सुयोग वाघ यांचे प्रत्येकी आठ गुण झाले. त्यांना अनुक्रमे दुसरा व तिसरा क्रमांक मिळाला. गोव्याचा आयएम अमेया अवदी याने साडेसात गुण नोंदविले. आणखी एक गोमंतकीय खेळाडू अनीश नाईक याने दोघा आयएम खेळाडूंना पराभूत करताना साडेसहा गुण नोंदविले.

उझेबेकिस्तानमधील स्पर्धेतही चमक

पुण्यातील स्पर्धेपूर्वी नितीश उझबेकिस्तानमधील प्रेझिडंट्स कप आंतरराष्ट्रीय स्पर्धेत सहभागी झाला होता. त्या स्पर्धेत त्याने सहा गुणांसह चौदावा क्रमांक मिळविताना सात एलो रेटिंग गुणही मिळविले होते. या स्पर्धेत नितीशने उझबेकिस्तानचा ग्रँडमास्टर मादामिनोव मुखिद्दीन याला नमविले होते, तर भारतीय ग्रँडमास्टर अभिमन्यू पुराणिक याला बरोबरीत रोखले होते.