IND vs ENG 1st Test: भारत आणि इंग्लंड यांच्यातील पाच सामन्यांच्या कसोटी मालिकेला सुरुवात झाली आहे. पहिल्या कसोटी समान्यात लीड्सच्या मैदानावर जसप्रीत बुमराहची जादू पाहायला मिळाली. बुमराह पुन्हा एकदा इंग्लंडच्या फलंदाजांसाठी कर्दनकाळ ठरला. त्याने इंग्लंडविरोधात पुन्हा एकदा पंजा खोलला. बुमराहसमोर इंग्लंडची फलंदाजी चांगलीच झगडताना दिसली. शानदार स्पेलनंतर बुमराहला त्याच्या वर्कलोड मॅनेजमेंटबद्दल प्रश्न विचारण्यात आला. त्यावर तो अगदी स्पष्टच बोलला. बुमराह म्हणाला की, देवाची इच्छा असेपर्यंत खेळेन. बोलणे हे लोकांचे कामच आहे.

बुमराह वर्कलोडबद्दल काय म्हणाला?

तिसऱ्या दिवसाच्या खेळानंतर बुमराहला वर्कलोड व्यवस्थापनाबद्दल विचारले असता तो म्हणाला, "लोक बोलतच असतात. मी 10-12 वर्षांपासून खेळत आहे. मी आयपीएल खेळतो. देवाची इच्छा असेपर्यंत मी खेळेन. मी आभा नियंत्रित करु शकत नाही. मी फक्त माझ्या तयारीवर लक्ष केंद्रित करतो आणि चांगले प्रदर्शन करण्याचा प्रयत्न करतो."

बुमराहच्या गोलंदाजीदरम्यान पहिल्या कसोटीच्या तिसऱ्या दिवशी चार झेल सोडण्यात आले. भारतीय खेळांडूच्या खराब कामगिरीबद्दलही जस्सीला प्रश्न विचारण्यात आला. त्यावर तो म्हणाला की, "झेल सोडणे हा खेळाचा एक भाग आहे. कोणीही हे जाणूनबुजून करत नाही. खेळाडू अनुभवातून शिकतो."

बुमराहची शानदार गोलंदाजी

लीड्सच्या मैदानावर बुमराहने शानदार गोलंदाजी केली. बुमराहच्या शानदार गोलंदाजीमुळे भारतीय संघ इंग्लंडला 465 धावांवर रोखण्यात यशस्वी झाला. त्याच्या स्पेलमध्ये बुमराहने जॅक क्रॉली, बेन डकेट, जो रुट (Joe Root), हॅरी ब्रूक आणि टंग यांना पॅव्हेलियनमध्ये धाडले. परदेशात सर्वाधिक वेळा 5 विकेट्स घेण्याच्या बाबतीत बुमराहने कपिल देवची बरोबरी केली. बुमराहने आतापर्यंत 12 वेळा घराबाहेर खेळताना एका डावात 5 विकेट्स घेण्याचा विक्रम केला. कपिल देवने 66 कसोटी सामन्यांमध्ये हा विक्रम केला होता. मात्र जस्सीने केवळ 34 कसोटी सामन्यांमध्ये हा विक्रम केला.