पणजी: गोव्यात येत्या डिसेंबरमध्ये दुसऱ्यांदा इंडियन प्रीमियर लीग (आयपीएल) क्रिकेट स्पर्धेचा लिलाव होणार आहे. यापूर्वी २००९ मध्ये स्पर्धेचा मिनी लिलाव उत्तर गोव्यात झाला होता.

आयपीएल चेअरमन अरुण धुमल यांनी ‘पीटीआय’ वृत्तसंस्थेला दिलेल्या माहितीनुसार, डिसेंबर महिन्याच्या मध्यास गोव्यात आयपीएल लिलाव होईल. यापूर्वी तीन वेळा परदेशात (अनुक्रमे दुबई, जेद्दाह, अबु धाबी) लिलाव प्रक्रिया पार पडली होती.

आता देशात लिलावाचे पुनरागमन होत आहे. ‘‘आम्ही गोव्यात ठिकाण निश्चित केले आहे. १५ ते १६ डिसेंबर या संभाव्य तारखा आहेत,’’ असे धुमल यांनी सांगितले. गोवा क्रिकेट असोसिएशनमधील (जीसीए) सूत्राने दिलेल्या माहितीनुसार, यावेळचा आयपीएल लिलाव दक्षिण गोव्यात होऊ शकतो.

‘जीसीए’चा या प्रक्रियेत थेट सहभाग नसेल. लिलाव प्रक्रिया आयपीएल समिती हाताळेल. लिलावानिमित्त सहभागी फ्रँचायजी संघाचे मालक, सहमालक, सीईओ, कर्णधार, मेंटॉर, प्रमुख खेळाडू उपस्थित राहतील.