Rohit Sharma Record IND VS ENG 3rd ODI

इंग्लंडविरुद्धच्या दुसऱ्या एकदिवसीय सामन्यात रोहित शर्माने ९० चेंडूत ११९ धावा केल्या. यादरम्यान त्याने १२ चौकार आणि ७ षटकार मारले. या खेळीनंतर, चाहत्यांना तिसऱ्या एकदिवसीय सामन्यातही त्याच्याकडून मोठ्या खेळीची अपेक्षा आहे. या सामन्यात त्याला मोठा विक्रम करण्याची संधी आहे.

भारत आणि इंग्लंड यांच्यातील एकदिवसीय मालिकेतील शेवटचा सामना बुधवार, १२ फेब्रुवारी रोजी अहमदाबादमधील नरेंद्र मोदी स्टेडियमवर खेळला जाणार आहे.

रोहितने या मालिकेतील शेवटच्या सामन्यात १३ धावा केल्या तर तो एकदिवसीय आंतरराष्ट्रीय क्रिकेटमध्ये सर्वात जलद ११,००० धावा करणारा जगातील दुसरा फलंदाज बनेल.

२३ जून २००७ रोजी बेलफास्टमध्ये आयर्लंडविरुद्ध पदार्पण केल्यापासून रोहितने २६७ एकदिवसीय सामन्यांमध्ये १०,९८७ धावा केल्या आहेत. एकदिवसीय सामन्यात सर्वात जलद ११,००० धावा करण्याचा विक्रम विराट कोहलीच्या नावावर आहे.

विराट कोहलीने त्याच्या २३० व्या एकदिवसीय सामन्यातील २२२ व्या डावात ११००० धावांचा टप्पा ओलांडला होता.

शतक झळकावले तर 'हा' विक्रम करणार

जर रोहितने इंग्लंडविरुद्धच्या तिसऱ्या एकदिवसीय सामन्यात शतक झळकावले तर तो सचिन तेंडुलकर आणि कोहलीनंतर आंतरराष्ट्रीय क्रिकेटमध्ये ५० शतके करणारा तिसरा भारतीय फलंदाज ठरेल.

क्रिकेटच्या तिन्ही फॅारमॅटमध्ये १०० शतके ठोकण्याचा विक्रम सचिनच्या नावावर आहे. यानंतर विराट कोहली येतो. त्याने आतापर्यंत ५४४ सामन्यांमध्ये ८१ शतकं झळकावली आहेत.