पणजी: धेंपो स्पोर्टस क्लब सध्या इंडियन फुटबॉल लीगमध्ये (आयएफएल) अखेरच्या दहाव्या क्रमांकावर आहे. अगोदरच्या लागोपाठ दोन लढतीत पराभव पत्करल्यानंतर माजी आय-लीग विजेता संघ गुरुवारी(ता. २) नामधारी एफसीविरुद्ध खेळेल, त्यामुळे नामुष्की टाळण्यासाठी गोव्यातील संघाला दक्ष राहावे लागले.

सामना फातोर्डा येथील पंडित जवाहरलाल नेहरू स्टेडियमवर खेळला जाईल. पाच सामने खेळल्यानंतर धेंपो क्लबच्या खाती फक्त दोन गुण आहेत. अजूनही त्यांना विजय मिळालेला नसून दोन बरोबरी व तीन पराभवांसह त्यांची घसरण झालेली आहे.

धेंपो क्लबला मागील दोन लढतीत अनुक्रमे गोकुळम केरळा (२-०) व श्रीनिदी डेक्कन (३-१) या संघांकडून पराभव पत्करावा लागला. धेंपो क्लबचा बचाव कमजोर असून स्पर्धेत त्यांनी तब्बल ११ गोल स्वीकारले आहेत.

पंजाबमधील नामधारी एफसीने पाच लढतीतून सहा गुणांची कमाई केली आहे. एक विजय, तीन बरोबरी व एक पराभव अशी कामगिरी नोंदविली आहे. अगोदरच्या दोन लढतीत ते अपराजित आहेत. श्रीनिदी डेक्कनविरुद्धच्या १-१ गोलबरोबरीनंतर त्यांनी रियल काश्मीरला १-० असे पराजित केले. नामधारी संघ गोव्यातही पूर्ण तीन गुणांसाठी प्रयत्नशील असेल.

प्रशिक्षक समीर यांचा सकारात्मक दृष्टिकोन

धेंपो क्लबचे प्रशिक्षक समीर नाईक यांनी गुरुवारच्या लढतीबाबत सकारात्मक दृष्टिकोन बाळगला आहे. ते म्हणाले, ‘‘आता आम्ही पुन्हा घरच्या मैदानावर परतलो आहोत आणि काही सराव सत्रेही घेतली आहेत. आम्ही पुन्हा एकत्र आलो आहोत, काही विशिष्ट बाबींवर काम केले आहे आणि मला वाटते की संघामध्ये आता मोठ्या प्रमाणात सकारात्मकता आहे. एकाग्रतेच्या अभावामुळे आम्हाला सामने गमवावे लागले आणि त्यावर आम्ही काम केले आहे. मला पूर्ण खात्री आहे की उद्या मैदानात उतरलेला धेंपो संघ पूर्णपणे वेगळा दिसेल.’’

गतमोसमातील लढतींत

३ डिसेंबर २०२४ रोजी धेंपो क्लबचा १-० असा विजय

१३ फेब्रुवारी २०२५ रोजी धेंपो क्लब व नामधारी यांच्यात २-२ गोलबरोबरी