I League Football Churchill Brothers Vs Delhi FC

पणजी: माजी विजेत्या चर्चिल ब्रदर्सने आय-लीग फुटबॉल स्पर्धेतील अग्रस्थान मजबूत करताना शुक्रवारी दिल्ली एफसीवर २-१ असा विजय प्राप्त केला. सामना पंजाबमधील माहिलपूर येथे झाला.

चर्चिल ब्रदर्सने सामन्यातील पूर्वार्धात दोन गोलची महत्त्वपूर्ण आघाडी प्राप्त केली. १८ व्या मिनिटास दक्षिण आफ्रिकन वेड लेके याने गोल केला, तर ३७व्या मिनिटास ट्रिजॉय डायस याने गोव्यातील संघाची स्थिती बळकट करणारा गोल नोंदविला. बदली खेळाडू ह्रदय जैन याने ८१व्या मिनिटास शानदार फटक्यावर दिल्ली एफसीची पिछाडी एका गोलने कमी केली.

चर्चिल ब्रदर्सचा हा नऊ सामन्यांतील सहावा विजय ठरला. गुणतक्त्यात त्यांचे आता सर्वाधिक १९ गुण झाले आहेत. दिल्ली एफसीला चौथा पराभव पत्करावा लागला. त्यामुळे नऊ लढतींतून त्यांचे नऊ गुण कायम राहिले. चर्चिल ब्रदर्सचा स्पर्धेतील पुढील सामना २५ जानेवारी रोजी अवे मैदानावर राजस्थान युनायटेडविरुद्ध होईल.