I League Dempo Club Vs Shillong Lajong FC

पणजी: आय-लीग फुटबॉल स्पर्धेत प्रगती साधण्यासाठी इच्छुक असलेल्या धेंपो स्पोर्टस्‌ क्लब, तसेच शिलाँग लाजाँग एफसी यांच्यातील सामना रंगतदार होण्याचे संकेत आहेत. सामना बुधवारी (ता. १९) फातोर्डा येथील पंडित जवाहरलाल नेहरू स्टेडियमवर खेळला जाईल.

संघातील नवा परदेशी खेळाडू मार्कुस जोसेफ याच्या गोलमुळे मागील लढतीत धेंपो क्लबने नामधारी एफसीला २-२ असे गोलबरोबरीत रोखले होते. त्यांचे सध्या १४ सामन्यांतून १८ गुण असून ते आठव्या क्रमांकावर आहेत. शिलाँग लाजाँग एफसी १४ सामन्यांतून २२ गुणांसह पाचव्या क्रमांकावर आहे. मागील लढतीत त्यांनी घरच्या मैदानावर श्रीनिदी डेक्कनला ४-० असे सहज नमविले होते. स्पर्धेच्या पहिल्या टप्प्यात मागील ३० नोव्हेंबर रोजी शिलाँग येथे धेंपो क्लबने शिलाँग लाजाँगला २-० फरकाने नमविले होते.

शिलाँग लाजाँगविरुद्धच्या सामन्याविषयी धेंपो क्लबचे मुख्य प्रशिक्षक समीर नाईक यांनी सांगितले की, प्रत्येक वेळी आम्ही मैदानात उतरताना विजयासाठीच खेळतो. हा सामना आमच्यासाठी अत्यंत महत्त्वाचा आहे, कारण जर आम्ही उद्या जिंकलो, तर आम्ही पुन्हा स्पर्धेत पुढे जाण्यासाठी सक्षम बनू.

संघातील नवा खेळाडू त्रिनिदाद-टोबॅगोचा मार्कुस जोसेफ याचे समीर यांनी कौतुक केले. त्याच्याविषयी समीर म्हणाले, त्याला खेळविण्याबाबत मी संधी घेतली आणि ती जुळून आली. तो जणू सहा महिन्यांपासून आमच्या संघात आहे असे वाटले. तो सहजपणे संघाशी समरस झाला आहे. त्याने इतर खेळाडूंसोबत छान समन्वय साधला आणि भारतीय फुटबॉलमधील अगोदरच्या अनुभवामुळे त्याने पटकन जुळवून घेतले.