I League: पेनल्टी गोलमुळे स्पोर्टिंग क्लबचा पराभव! युनायटेड स्पोर्टने मारली बाजी; 'हेम्ब्रम' ठरला हिरो

I League Sporting Club Vs United Sports Club

पणजी: सामन्याच्या पूर्वार्धात पेनल्टी गोल स्वीकारल्यामुळे आय-लीग २ फुटबॉल स्पर्धेत स्पोर्टिंग क्लब द गोवा संघाला शनिवारी निसटता पराभव पत्करावा लागला. पश्चिम बंगालमधील कल्याणी येथे झालेल्या लढतीत युनायटेड स्पोर्टस क्लबने १-० फरकाने विजयाची नोंद केली.

तारक हेम्ब्रम याने १०व्या मिनिटास पेनल्टी फटक्यावर गोल केला. युनायटेड क्लबने ही आघाडी अखेरपर्यंत टिकवली. त्यांचा हा पाच सामन्यांतील दुसरा विजय असून सात गुण झाले आहेत. स्पोर्टिंग क्लब द गोवास दुसरा पराभव पत्करावा लागला. त्यामुळे चार लढतीनंतर चार गुण कायम राहिले. स्पोर्टिंग क्लब गोवाचा पुढील सामना २० फेब्रुवारी एला-जुने गोवे येथे ट्राऊ एफसीविरुद्ध होईल.

चानमारी एफसी अव्वल

दरम्यान, स्पर्धेतील आणखी एका सामन्यात ऐजॉल-मिझोरामच्या चानमारी एफसीने एफसी बंगळूर युनायटेडला २-० फरकाने नमवून अग्रस्थान भक्कम केले. त्यांचा हा पाच सामन्यांतील चौथा विजय असून सर्वाधिक १३ गुण झाले आहेत. बंगळूर युनायटेडचे तिसऱ्या पराभवामुळे पाच लढतीनंतर सहा गुण कायम राहिले.