I League Churchill Brothers Vs Gokulam Kerala

पणजी: चर्चिल ब्रदर्सने प्रतिस्पर्धी गोकुळम केरळाच्या विस्कळीत बचावाचा लाभ उठविला आणि विजयासह आय-लीग फुटबॉल स्पर्धेत दोन गुणांची आघाडी घेत पुन्हा अग्रस्थान पटकावले. राय पंचायत मैदानावर शुक्रवारी झालेल्या लढतीत यजमान संघाने २-१ फरकाने बाजी मारली.

लालरेमरुआता राल्टे याच्या फ्रीकिक गोलवर चर्चिल ब्रदर्सने २१व्या मिनिटास गोल खाते उघडले. नंतर ६२व्या मिनिटास किंग्सली फर्नांडिस याने केलेल्या गोलमुळे चर्चिल ब्रदर्सची स्थिती मजबूत झाली. त्यांचा हा स्पर्धेतील एकूण २६वा गोल ठरला. भरपाई वेळेत (९०+४वे मिनिट) मायकल सूसाईराज याच्या गोलमुळे गोकुळम केरळास पिछाडी एका गोलने कमी करता आली.

मागील लढतीत याच मैदानावर तळाच्या स्पोर्टिंग क्लब बंगळूरविरुद्ध बरोबरीवर समाधान मानावे लागलेल्या चर्चिल ब्रदर्सने शुक्रवारी स्पर्धेतील आठव्या विजयाची नोंद केली. त्यांचे १३ सामन्यांतून २६ गुण झाले आहेत. दुसऱ्या क्रमांकावरील नामधारी एफसीचे १२ लढतीतून २४ गुण आहेत. नामधारीचा सामना शनिवारी शिलाँग लाजाँग एफसीविरुद्ध होणार आहे, तोपर्यंत चर्चिल ब्रदर्सचे अग्रस्थान अबाधित असेल. गोकुळम केरळास सलग दुसरा, तर एकंदरीत चौथा पराभव पत्करावा लागला. १३ लढतीतून त्यांचे १९ गुण कायम असून ते सहाव्या स्थानी आहेत. चर्चिल ब्रदर्सचा पुढील सामना ११ फेब्रुवारीस राय मैदानावरच दिल्ली एफसीविरुद्ध खेळला जाईल.