पणजी: गोव्याच्या फलंदाजांना चांगला जम बसत असताना मोठी धावसंख्या रचणे शक्य झाले नाही, परिणामी यजमान संघाला आसामविरुद्धच्या कुचबिहार करंडक १९ वर्षांखालील क्रिकेट सामन्याच्या पहिल्या दिवसअखेर रविवारी ४ बाद २१८ धावांची मजल मारता आली.

स्पर्धेच्या एलिट ड गटातील चार दिवसीय सामना रविवारपासून पणजी जिमखान्याच्या भाऊसाहेब बांदोडकर मैदानावर सुरू झाला. गोव्याच्या डावात कर्णधार यश कसवणकर (६०, ११४ चेंडू, ३ चौकार, १ षटकार) याने अर्धशतक नोंदविले, तर शंतनू नेवगी (४९, १२९ चेंडू, ६ चौकार) याचे अर्धशतक एका धावेने हुकले.

यश व शंतनू यांनी तिसऱ्या विकेटसाठी ६५ धावांची भागीदारी केली. त्यापूर्वी, आदित्य कोटा (३८, १२७ चेंडू, ४ चौकार) व सार्थक भिके (३२, ६८ चेंडू, ५ चौकार) यांनी गोव्याला २२.३ षटकांत ५५ धावांची सावध सलामी दिली.

मागील लढतीत छत्तीसगडविरुद्ध द्विशतक केलेल्या यश याला रविवारी आणखी एका शतकी खेळीची संधी होती, पण मध्यमगती गोलंदाज अमित चौधरी याच्या गोलंदाजीवर त्याने दीपंकर पॉल याच्या हाती झेल दिला..

संक्षिप्त धावफलक

गोवा, पहिला डाव ः ९० षटकांत ४ बाद २१८ (आदित्य कोटा ३८, सार्थक भिके ३२, शंतनू नेवगी ४९, यश कसवणकर ६०, दिशांक मिस्कीन नाबाद २६, आराध्य गोयल नाबाद ६, अमित चौधरी १-३६, मोहित ठाकूर २-४२, पृथ्वीराज कश्यप १-३२).