पणजी: गोव्याच्या १६ वर्षांखालील मुलांच्या क्रिकेट संघाच्या कमजोर फलंदाजीचे पुन्हा एक प्रदर्शन घडले. त्यामुळे विजय मर्चंट करंडक क्रिकेट स्पर्धेच्या एलिट ड गटात फॉलोऑननंतर ते सलग दुसऱ्या पराभवाच्या दिशेने आहेत.

छत्तीसगडमधील रायपूर येथील शहीद वीर नारायण सिंग स्टेडियमवर सुरु असलेल्या सामन्याच्या दुसऱ्या दिवशी बडोद्याने पहिला डाव ८ बाद ३९९ धावांवर घोषित केला. नंतर गोव्याचा डाव १२१ धावांत संपुष्टात आला.

बडोद्याला २७८ धावांची मोठी आघाडी मिळाली. त्यांनी गोव्यावर फॉलोऑन लादला. गोव्याची दुसऱ्या डावातही शनिवारी दिवसअखेर ३ बाद ५१ अशी घसरगुंडी उडाली, ते अजून २२७ धावांनी मागे आहेत.

संक्षिप्त धावफलक ः बडोदा, पहिला डाव ः ८ बाद ३९९ घोषित.

गोवा, पहिला डाव ः ५१.१ षटकांत सर्वबाद १२१ (अदीप मिस्कीन ७, जेडन परेरा २७, साईराज गोवेकर ०, विनीत कामत ८, महंमद उझैर ६, आशुतोष शेट्टी १, शौनक तेली २९, मृणाल नाईक ५, अनुराग बहादूर ९, सारंग गोवेकर १८, संकल्प नाईक नाबाद ०, युवराज सिंह ३-३७, मलिकेश २-२१, जैनम पटेल २-३, तिलक पटेल ३-२५).

गोवा, दुसरा डाव (फॉलोऑन) ः २१ षटकांत ३ बाद ५१ (अदीप मिस्कीन २४, जेडन परेरा १०, साईराज गोवेकर १०, मृणाल नाईक नाबाद १, अनुराग बहादूर नाबाद ०, युवराज सिंह २-९).