पणजी: गोव्याच्या रणजी करंडक क्रिकेट संघाला नव्या कर्णधाराचे वेध लागले असून २०२५-२६ मोसमातील खडतर एलिट मोहीम संघ नेतृत्वबदलासह खेळू शकतो. सलग तीन मोसम जबाबदारी पेललेल्या अष्टपैलू दर्शन मिसाळला पर्याय मिळण्याचे संकेत आहेत.

गोव्याची रणजी करंडक स्पर्धेत एलिट ब गटातील मोहीम १५ ऑक्टोबरपासून चंडीगडविरुद्धच्या लढतीने पर्वरीत सुरू होईल. त्यानंतर अनुक्रमे कर्नाटक, पंजाब, मध्य प्रदेश, सौराष्ट्र, महाराष्ट्र व केरळ या बलाढ्य संघाविरुद्ध गोव्याला खेळावे लागेल. मिलाप मेवाडा यांच्या मार्गदर्शनाखाली गोव्याने मोसमपूर्व तयारीत कर्नाटक राज्य क्रिकेट असोसिएशनच्या (केएससीए) डॉ (कॅप्टन) के. थिम्माप्पिया स्मृती करंडक क्रिकेट स्पर्धेत उपांत्य फेरीपर्यंत मजल मारली होती.

जीसीएतील विश्वसनीय सूत्रांच्या माहितीनुसार, लागोपाठ तीन मोसम संघाचे नेतृत्व केल्यानंतर डावखुरा अष्टपैलू दर्शन मिसाळ याच्या जागी नव्या कर्णधारास संधी देण्याचा विचार आहे. दर्शन सध्या ३३ वर्षांचा आहे.

पुढील तीन-चार वर्षांचा विचार करून तेवढ्या कालावधीत संघ बांधणीसह नेतृत्व करणारा खेळाडू जीसीएला हवा आहे. त्यादृष्टीने यंदा नेतृत्वबदल करण्यास संघटना इच्छुक आहे. कर्णधार गोलंदाज नसावा, तर अनुभवी फलंदाज असावा असे जीसीएला वाटत आहे.

सगुण कामत जायबंदी झाल्यानंतर २०१७-१८ मध्ये दर्शनने गोव्याचे दोन सामन्यांत नेतृत्व केले होते, नंतर २०२२-२३ पासून तो संघाचा नियमित कर्णधार बनला. गतमोसमात अंतिम लढतीसह प्लेट विभागात सहाही सामने जिंकण्याची किमया गोव्याच्या संघाने साधली होती. एकंदरीत दर्शन कर्णधार असताना गोव्याने २२ पैकी ८ सामने जिंकले, ६ लढती अनिर्णित राहिल्या, तर ८ लढतीत पराभव पत्करावा लागला.

स्नेहल कवठणकरचे नाव आघाडीवर

रणजी संघ कर्णधारपदासाठी सध्या अनुभवी फलंदाज स्नेहल कवठणकर याचे नाव आघाडीवर असल्याचे विश्वसनीय सूत्राने सांगितले. स्नेहल १९ ऑक्टोबरला ३० वर्षांचा होईल. ५९ प्रथम श्रेणी सामन्यांत मध्यफळीतील शैलीदार फलंदाजाने ४७.९८च्या सरासरीने ४१२७ धावा केल्या आहेत. गतमोसमात या अनुभवी फलंदाजाने सहा सामन्यांत १८९.८०च्या सरासरीने ९४९ धावा केल्या होत्या, यामध्ये एका त्रिशतकाचा व दोन द्विशतकांचा समावेश होता. स्नेहलने यापूर्वी रणजी करंडक स्पर्धेत २०२१-२२ मध्ये गोव्याचे एलिट गटात नेतृत्व केले होते, तेव्हा तीन सामन्यांत गोव्याची दोन पराभव व एक अनिर्णित अशी कामगिरी होती.