पणजी: खेलो इंडिया बीच गेम्सच्या दुसऱ्या आवृत्तीत यंदा गोव्याची कामगिरी सुधारली. बीच व्हॉलिबॉलमधील सुवर्णपदकासह एकूण चार पदके जिंकून राज्याने पदकतक्त्यातील २६ संघांत पंधरावा क्रमांक पटकावला.

दीव येथे झालेल्या स्पर्धेत गोव्याला एक सुवर्ण, एक रौप्य व दोन ब्राँझ अशी एकूण चार पदके मिळाली. गतवेळी गोव्याला तीन पदके मिळाली होती व अठरावा क्रमांक मिळाला होता. यावेळी बीच व्हॉलिबॉलमध्ये प्रबळ सावंत व तेजस गावस या गोव्याच्या जोडीने पुरुष गटात विजेतेपदासह सुवर्णपदक प्राप्त केले.

या खेळात ब्राँझपदक थोडक्यात हुकले. अर्जुन पुरस्कार विजेते ब्रुनो कुतिन्हो यांच्या मार्गदर्शनाखालील गोव्याच्या बीच सॉकर संघाने सलग दुसऱ्या वर्षी रौप्यपदक जिंकून पदकमालिका कायम राखली.

गोव्याला दोन ब्राँझपदके पेंचाक सिलाट व सेपाक टाक्रो या खेळात मिळाली. पेंचाक सिलाटमध्ये महिलांच्या टॅंडिंग प्रकारातील ५५ किलो वजनगटात परमेश चौहान ही ब्राँझपदकाची मानकरी ठरली. सेपाक टाक्रो खेळात महिलांच्या ट्रायो टीम प्रकारात गोव्याच्या संघाला उपांत्य फेरीत पश्चिम बंगालविरुद्ध हार पत्करावी लागली. त्यामुळे ब्राँझपदकावर समाधान मानावे लागले.

क्रीडामंत्री तवडकर यांनी केले कौतुक

दुसऱ्या खेलो इंडिया बीच गेम्समध्ये पदके जिंकलेल्या गोव्याच्या क्रीडापटूंना बुधवारी क्रीडामंत्री रमेश तवडकर यांनी सन्मानीत केले. खेळाडूंची कामगिरी राज्यासाठी गौरवास्पद असल्याचे त्यांनी यावेळी नमूद केले. पर्वरी विधानसभा संकुलात झालेल्या कार्यक्रमास गोवा फुटबॉल विकास परिषदेचे उपाध्यक्ष धाकू मडकईकर, क्रीडा संचालक अजय गावडे, खेलो इंडिया उच्च कामगिरी संचालक एम. आर. सुमीत, गोवा क्रीडा प्राधिकरणाचे अधिकारी उपस्थित होते.