पणजी ः भारतीय क्रिकेट नियामक मंडळातर्फे (बीसीसीआय) घेण्यात येणाऱ्या गोलंदाजी प्रशिक्षण शिबिरासाठी फिरकी विभागात गोव्याचा ऑफ स्पिनर मोहित रेडकर याची निवड करण्यात आली आहे.

२३ ते २६ मार्च या कालावधीत बंगळूर येथील सेंटर ऑफ एक्सलन्स येथे भारताचे माजी महान ऑफस्पिनर हरभजन सिंग यांच्या मार्गदर्शनाखाली शिबिर होईल.

देशातील सर्व राज्यातील गोलंदाजांना या शिबिरासाठी निवडण्यात आले असून गोवा क्रिकेट असोसिएशनचे प्रतिनिधित्व करणारा मोहित एकमेव गोलंदाज आहे.

खेळाडूंच्या निवडीचे पत्र बीसीसीआय सेंटर ऑफ एक्सलन्सचे प्रमुख व्ही.व्ही.एस. लक्ष्मण यांनी संबंधित क्रिकेट संघटनांना पाठविले आहे.