पणजी: गोव्याचे इंटरनॅशनल मास्टर (आयएम) एथन वाझ आणि अमेय अवदी यांनी धडाकेबाज खेळ करताना ‘मनोहर पर्रीकर’ गोवा आंतरराष्ट्रीय खुल्या ग्रँडमास्टर बुद्धिबळ स्पर्धेच्या ‘अ’ गटात सोमवारी ग्रँडमास्टर बुद्धिबळपटूंना पराभवाचा धक्का दिला, तर ग्रँडमास्टर अनुराग म्हामल याने सलग तिसऱ्या विजयाची नोंद केली.

शानदार स्पर्धा

दरम्यान, स्पर्धा ताळगाव पठारावरील डॉ. श्यामाप्रसाद मुखर्जी इनडोअर स्टेडियममध्ये सुरु आहे. स्पर्धेच्या चौथ्या फेरीअंती तामिळनाडूचा ग्रँडमास्टर एस. पी. सेतूरमण, रशियाचा आयएम अलेक्झांडर स्लिझेवस्की, तामिळनाडूचा (Tamil Nadu) आयएम एस. नितीन व किर्गिझस्तानचा आयएम सेमेतेई तोलोगन तेगिन यांनी चारही डाव जिंकून प्रत्येकी चार गुणांसह संयुक्त अव्वल स्थान मिळवले आहे. अव्वल मानांकित ग्रँडमास्टर दीप्तयन घोष याला चौथ्या फेरीत बरोबरीवर समाधान मानावे लागले. त्यामुळे साडेतीन गुणांसह तो दुसऱ्या क्रमांकावर गेला.

स्पर्धेत अपराजित असलेल्या 13 वर्षीय एथनने (एलो 2412) तुलनेत अधिक अनुभवी ग्रँडमास्टर आर. आर. लक्ष्मण (एलो 2023) याला पराभूत केले. राष्ट्रकुल बुद्धिबळातील 16 वर्षांखालील सुवर्णपदक विजेत्या एथनचे हा स्पर्धेतील तिसरा विजय ठरला. अन्य एका बरोबरीसह त्याचे साडेतीन गुण असून तो संयुक्त दुसऱ्या स्थानी आहे. अमेय (एलो 2422) याने अमेरिकन ग्रँडमास्टर रसेट झियात्दिमोव (एलो 2031) याची विजयी कूच रोखले. शानदार विजयामुळे अमेयचे आता अडीच गुण झाले आहेत.

ग्रँडमास्टर अनुराग (एलो 2499) याने लौकिकास साजेसा खेळ करताना सलग तिसऱ्या विजयाची नोंद करून एकूण गुणसंख्या तीन गुणांवर नेली. चौथ्या फेरीत त्याने महाराष्ट्राची वूमन इंटरनॅशनल मास्टर (डब्ल्यूआयएम) मृदुल देहनकर (एलो 2121) हिला नमविले. आयएम ऋत्विज परब (एलो 2371) याने बलाढ्य प्रतिस्पर्ध्याविरुद्ध खिंड लढविली, पण अखेरीस पश्चिम बंगालमधील पाचवा मानांकित ग्रँडमास्टर मित्रभा गुहा (एलो 2509) गोव्याच्या (Goa) खेळाडूस भारी ठरला. पराभवामुळे ऋत्विजचे अडीच गुण कायम राहिले.