पणजी: गोवा क्रिकेट असोसिएशनची प्रीमियर लीग क्रिकेट स्पर्धा जिंकण्यासाठी पणजी जिमखान्यासमोर २१९ धावांचे लक्ष्य आहे. मंगळवारी सामन्याच्या दुसऱ्या दिवशीही गोलंदाजांचे वर्चस्व राहिले. चौगुले स्पोर्ट्‌स क्लबने पहिल्या डावात ३८ धावांची आघाडी प्राप्त केली.

पर्वरी येथील जीसीए मैदानावर सुरू असलेल्या दिवस-रात्र, गुलाबी चेंडूच्या अंतिम लढतीत दुसऱ्या दिवशी पणजी जिमखान्याचा वेगवान गोलंदाज हेरंब परब याने भन्नाट मारा केला. त्याने १० षटकांत २५ धावांत ५ गडी बाद केले. त्यामुळे २ बाद १३७ वरून चौगुले क्लबचा डाव ९ बाद १५४ असा गडगला आणि नंतर १८० धावांत संपुष्टात आला.

सामन्याच्या दुसऱ्या दिवशी २ बाद ७४ वरून पणजी जिमखान्याचा पहिला डाव समर्थ राणे (४-३२) व दर्शन मिसाळ (४-३७) या वेगवान-फिरकी जोडीने १२८ धावांत गुंडाळला. मंगळवारी खेळ थांबला तेव्हा पणजी जिमखान्याने दुसऱ्या डावात १ बाद १ धाव केली होती.

पणजी जिमखान्याचा डाव गुंडाळल्यानंतर चौगुले क्लबच्या डावाची सुरुवात आश्वासक होती. सलग दुसऱ्या डावात अर्धशतक केलेल्या डावखुऱ्या आर्यन नार्वेकर (५०) याने रिजुल पाठक (२५) याच्यासमवेत संघाला ८३ धावांची सलामी दिली. नंतर क्षितीज पटेल व मनन हिंग्राजिया यांनी तिसऱ्या विकेटसाठी ५० धावा जोडल्या. हेरंबने स्वतःच्याच गोलंदाजीवर क्षितिजला झेल पकडल्यानंतर चौगुले क्लबचा डाव पत्त्यांच्या बंगल्याप्रमाणे कोसळला.

संक्षिप्त धावफलक

चौगुले स्पोर्ट्‌स क्लब, पहिला डाव : १६६. पणजी जिमखाना, पहिला डाव (२ बाद ७४ वरून) : ५० षटकांत सर्वबाद १२८ (योगेश कवठणकर ४२, समर्थ राणे ४-३२, दर्शन मिसाळ ४-३७). चौगुले स्पोर्ट्‌स क्लब, दुसरा डाव : ५७.५ षटकांत सर्वबाद १८० (आर्यन नार्वेकर ५०, रिजुल पाठक २५, हेरंब परब ५-२५, तनय त्यागराजन २-६४). पणजी जिमखाना, दुसरा डाव : १.३ षटकांत १ बाद १.