पणजी ः एफसी गोवा संघ इंडियन सुपर लीग (आयएसएल) फुटबॉल स्पर्धेतील सलग पाच सामने अपराजित आहे, तरीही संघाचे मुख्य प्रशिक्षक मानोलो मार्केझ सावध आहेत. पुढील लढतीत खराब खेळ केल्यास निश्चितच नुकसान सोसावे लागेल, असा इशारा त्यांनी संघाला दिला आहे.

एफसी गोवाचा स्पर्धेतील पुढील सामना रविवारी (ता. २२) चेन्नईयीन एफसीविरुद्ध होणार आहे. या सामन्यासाठी चेन्नईला रवाना होण्यापूर्वी मानोलो शुक्रवारी पर्वरी येथे पत्रकार परिषदेत बोलत होते. पंजाब एफसीच्या खेळाडूस रेड कार्ड मिळाल्यानंतर एफसी गोवाने मागील लढतीत १-१ अशी गोलबरोबरी साधली होती.

त्या सामन्यातील आपल्या संघाच्या एकंदरीत कामगिरीवर मार्केझ खूश नाहीत. या पार्श्वभूमीवर त्यांनी चेन्नईयीनविरुद्धच्या लढतीपूर्वी संघाला सावध केले आहे. मार्केझ यांनी सांगितले, की ``प्रतिस्पर्धी (चेन्नईयीन) चांगले फुटबॉल खेळत असून चेंडूवर नियंत्रण राखत आहेत. जर आम्ही त्यांच्याविरुद्ध खराब खेळ केल्यास नुकसान निश्चित आहे आणि आम्ही चांगले खेळल्यास चेन्नईयीनसाठी सामना नक्कीच कठीण ठरेल.

आमच्या संघात पुरेसे पर्याय असून राखीव फळीतील खेळाडूही दर्जेदार आहेत. संघाने सातत्यपूर्ण खेळ करणे आवश्यक आहे.`` आपला संघ वर्चस्व राखत संधी निर्माण करतो, पण गोल करण्यात कमी पडतो ही खंत मार्केझ यांना सतावत आहे.

``प्रत्येकावर जबाबदारी आहे. त्यांनी त्यास न्याय देणे आवश्यक आहे,`` असे त्यांनी नमूद केले.चेन्नईयीन एफसीने मागील लढतीत केरळा ब्लास्टर्सला एका गोलने नमवून स्पर्धेतील पहिल्या विजयाची नोंद केली होती. त्यांचे चार लढतीतून चार गुण असून १४ संघांच्या स्पर्धेत ते सध्या अकराव्या क्रमांकावर आहे.