हैदराबादला ७८व्या संतोष करंडक राष्ट्रीय फुटबॉल स्पर्धेच्या मुख्य फेरीचे यजमानपद बहाल करण्यात आले आहे. यासंबंधी घोषणा अखिल भारतीय फुटबॉल महासंघाने (एआयएफएफ) बुदवारी नवी दिल्ली येथे केली. यजमान तेलंगणा, गतविजेते सेनादल, गतउपविजेते गोवा या संघांना थेट मुख्य फेरीत प्रवेश मिळाला असून त्यांच्यासमवेत इतर नऊ गटातील विजेते संघ खेळतील. मुख्य फेरी डिसेंबर महिन्याच्या पहिल्या आठवड्यात घेण्याचे नियोजन आहे. गटवार स्पर्धा नोव्हेंबरमध्ये खेळली जाईल.

हैदराबादमध्ये ५७ वर्षांत प्रथमच भारतीय फुटबॉलमधील प्रतिष्ठेची स्पर्धा होत आहे. यापूर्वी १९६६-६७ मध्ये ‘सिटी ऑफ पर्ल्स’मध्ये संतोष करंडक स्पर्धा रंगली होती. तेव्हा रेल्वेने सेनादलास नमवून विजेतेपद पटकावले होते.

२०२३-२४ मोसमातील संतोष करंडक स्पर्धेची मुख्य फेरी अरुणाचल प्रदेशमध्ये झाली होती. ९ मार्च २०२४ रोजी झालेल्या अंतिम लढतीत सेनादलाने गोव्याला १-० फरकाने हरवून सातव्यांदा करंडक पटकावला होता. त्यामुळे गोव्याला नवव्यांदा उपविजेतेपदावर समाधान मानावे लागले होते. गोव्याने ही स्पर्धा पाचवेळा जिंकली असून शेवटचे विजेतेपद २०१६-१७ मोसमात होते.

पात्रता फेरी गटवारी

अ गट ः जम्मू-काश्मीर, लडाख, हिमाचल प्रदेश, पंजाब. ब गट ः चंडीगड, उत्तराखंड, हरियाना, दिल्ली. क गट ः उत्तर प्रदेश, झारखंड, बंगाल, बिहार. ड गट ः आसाम, सिक्कीम, मेघालय, त्रिपुरा. ई गट ः अरुणाचल प्रदेश, नागालँड, मणिपूर, मिझारोम. फ गट ः मध्य प्रदेश, छत्तीसगड, ओडिशा. ग गट ः तमिळनाडू, आंध्र प्रदेश, कर्नाटक, अंदमान-निकोबार. ह गट ः केरळ, पुदुचेरी, लक्षद्वीप, रेल्वे. ई गट ः महाराष्ट्र, गुजरात, दादरा-नगरहवेली आणि दमण-दीव, राजस्थान.