पणजी: कुचबिहार करंडक १९ वर्षांखालील क्रिकेट स्पर्धेतील उपांत्यपूर्व लढतीत निराशाजनक फलंदाजीमुळे गोव्याच्या पहिल्या दिवशी नुकसान झाले. मध्य प्रदेशविरुद्ध अखेरच्या सहा विकेट अवघ्या ३७ धावांत गमावल्यामुळे यजमानांचा पहिला डाव १६४ धावांत संपुष्टात आला.

कोटार्ली-सांगे येथील जीसीए मैदानावर गुरुवारपासून चार दिवसीय सामन्यात सुरवात झाली. सामन्याच्या पहिल्या दिवसअखेर मध्य प्रदेशने चार षटकांत १ बाद १२ धावा केल्या होत्या. जलदगती गोलंदाज समर्थ राणे याने सलामीच्या हर्षित दुबे याला त्रिफळाचीत बाद केल्यामुळे यजमानांना दिलासा मिळाला.

गोव्याच्या डावात आराध्य गोयल (५०) याने चिवट अर्धशतक नोंदविताना दिशांक मिस्कीन (४४) याच्यासमवेत पाचव्या विकेटसाठी ७६ धावांची भागीदारी केली, त्यामुळे गोव्याला किमान दीडशतक पार केल्याचे समाधान लाभले.

एलिट गटातील या लढतीत मध्य प्रदेशने नाणेफेक जिंकून गोव्यास प्रथम फलंदाजीस पाचारण केले. त्यांची सुरवात अतिशय खराब ठरली. डावातील पहिल्याच चेंडूवर आदित्य कोटा याच्या यष्टीचा युवराजसिंग कांग याने वेध घेतला.

लगेच ३ बाद २४ व नंतर ४ बाद ५१ अशी स्थिती झाल्यानंतर गोव्याचा डाव लवकर गुंडाळणार अशी स्थिती असताना दिशांक व आराध्य यांनी संघाला सावरले. दिशांकला अर्धशतकास सहा धावा कमी पडल्या. १४७ चेंडूंतील खेळीत त्याने सहा चौकार मारले.

ऑफस्पिनर यशवर्धनसिंग चौहान याने त्याला बाद केले. दिशांक संघाची धावसंख्या १२७ इतकी असताना पाचव्या विकेटच्या रुपाने बाद झाला. त्यानंतर गोव्याच्या फलंदाजांनी मध्य प्रदेशच्या फिरकी माऱ्यासमोर नमते घेतले. आराध्य गोव्याची आठवी विकेट ठरला. त्याला डावखुरा फिरकी गोलंदाज प्रतीक शुक्ला याने त्रिफळाचीत बाद केले.

संक्षिप्त धावफलक

गोवा, पहिला डाव ः ८२.५ षटकांत सर्वबाद १६४ (आदित्य कोटा ०, सार्थक भिके ३१, शंतनू नेवगी ७, यश कसवणकर ०, दिशांक मिस्कीन ४४, आराध्य गोयल ५०, साई नाईक १, चिगुरुपती व्यंकट ६, मिहीर कुडाळकर १२, शिवेन बोरकर ४, समर्थ राणे नाबाद ४, आयुष शुक्ला २-२१, यशवर्धनसिंग चौहान ३-३४, प्रतीक शुक्ला २-१३).

मध्य प्रदेश, पहिला डाव ः ४ षटकांत १ बाद १२ (हर्षित दुबे ४, हर्षित यादव नाबाद ७, आयाम सारादाना नाबाद १, समर्थ राणे २-१-४-१, चिगुरुपती व्यंकट २-०-८-०).