पणजी: इंडियन सुपर लीग (आयएसएल) फुटबॉल स्पर्धेत पदार्पणाचा मोसम खेळणाऱ्या गोव्याच्या चर्चिल ब्रदर्सला गुरुवारी घरच्या मैदानावर सलग तिसऱ्या पराभवाला सामोरे जावे लागले. फातोर्डा येथील पंडित जवाहरलाल नेहरू स्टेडियमवर २-० असा विजय नोंदवत गुवाहाटीच्या नॉर्थईस्ट युनायटेडने शानदार घोडदौड राखली.

नॉर्थईस्ट युनायटेडला पूर्ण तीन गुण मिळवून देणारे दोन्ही गोल त्यांच्या स्पॅनिश खेळाडूंनी नोंदविले. इथ्यान गोन्झालेझ याने १६व्या मिनिटास गोल केल्यानंतर भरपाई वेळेतील तिसऱ्या मिनिटाला (९०+३) अँटोनियो मोयानोने दुसरा गोल नोंदवून संघाचा विजयावर शिक्कामोर्तब केले.

यासह सामना पाहण्यासाठी खास स्टेडियमवर उपस्थित हिंदी चित्रपट अभिनेता व संघाचा मालक जॉन अब्राहम याला आगळी भेट प्राप्त झाली. स्पर्धेतील तिसऱ्या विजयामुळे नॉर्थईस्ट युनायटेडचे पाच सामन्यांतून ११ गुण झाले आहे, तर चार लढतीनंतर चर्चिल ब्रदर्सचे तीन गुण कायम राहिले.

बचावातील त्रुटींचा फटका

चर्चिल ब्रदर्सला बचावातील त्रुटींचा फटका बसत आहे. त्यांनी स्पर्धेतील चार सामन्यांत तब्बल १० गोल स्वीकारले आहेत. आता फिफा वेळापत्रक कालावधीमुळे आयएसएल स्पर्धा खंडित होईल, त्यानंतर चर्चिल ब्रदर्सची मोहीम पुन्हा सुरू होईल. त्यांचा पुढील सामना फातोर्डा येथेच मोहन बागानविरुद्ध २२ नोव्हेंबरला खेळला जाईल.