पणजी: गेल्या १८ वर्षांपासून सहाव्या वेतन आयोगानुसार वेतन घेणाऱ्या गोव्यातील पंचायत कर्मचाऱ्यांनी आता आंदोलनाचा पवित्रा घेतला आहे. सातवा वेतन आयोग लागू करण्यासह विविध प्रलंबित मागण्यांसाठी ऑल गोवा पंचायत वर्कर्स युनियनने (आयटक संलग्न) डिसेंबरपासून आंदोलन सुरू करण्याचा निर्णय घेतला आहे. मागण्या मान्य होईपर्यंत आंदोलन सुरू ठेवण्याचा निर्धार संघटनेच्या वार्षिक सभेत करण्यात आला.
पणजी येथील इन्स्टिट्यूट पिएदाद सभागृहात ‘आयटक’चे उपमहासचिव ॲड. राजू मंगेशकर यांच्या अध्यक्षतेखाली ही सभा झाली. सरचिटणीस संतोष नाईक यांनी वार्षिक अहवाल सादर केला. पंचायत कर्मचाऱ्यांचा कर्मचारी आकृतिबंध १९९६ पासून बदललेला नाही. ग्रामपंचायतींच्या कामकाजात वाढ झाली असतानाही कर्मचारी संख्या आणि पदरचनेत सुधारणा झालेली नाही. त्यामुळे कर्मचाऱ्यांवरील कामाचा ताण वाढला आहे.
सातवा वेतन आयोग लागू करणे, कर्मचारी आकृतिबंधात सुधारणा करणे, तात्पुरत्या कर्मचाऱ्यांना सेवेत नियमित करणे, थकीत वेतन आणि निवृत्तिवेतनाचे प्रश्न सोडविणे या मागण्या संघटनेने मांडल्या आहेत. सभेला ख्रिस्तोफर फोन्सेका, प्रसन्न उटगी उपस्थित होते. यावेळी नवीन पदाधिकाऱ्यांची निवड करण्यात आली. अध्यक्षपदी प्रदीप गावस, उपाध्यक्षपदी प्रीतम फडते व अनिल नाईक, तर सरचिटणीसपदी मोहन सामंत यांची निवड झाली. संतोष नाईक यांची खजिनदारपदी निवड करण्यात आली.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
