पणजी: नाटकांचे प्रयोग, शूटिंग आणि इफ्फीसाठी गोव्‍यात वरचेवर येणे होत असते. येथे असलो तरी मी माझ्या राज्याबाहेर आलोय असे वाटतच नाही. गोमंतकीय रसिक, प्रेक्षकांचे मला सदोदित प्रेम मिळते, अशी भावना प्रसिद्ध अभिनेते सिद्धार्थ जाधव यांनी व्यक्त केली.

गोवा मराठी चित्रपट महोत्सवात संवाद साधला असता सिद्धार्थ जाधव बोलत होते. ते म्‍हणाले, गोमंतकीय लोक मराठी नाटक आणि चित्रपटांवर अतिशय प्रेम करणारे असल्याने गोव्यात येणे, गोवेकरांशी संवाद साधणे मला सदाच आनंददायी वाटते.

लवकरच येतोय ‘आतली बातमी फुटली’

‘आतली बातमी फुटली’ हा माझा नवा सिनेमा लवकरच येत आहे. या चित्रपटाच्या प्रीमियर या महोत्सवात प्रदर्शित झालाय. रसिकांचे मनोरंजन करणारा हा चित्रपट आहे. १९ सप्टेंबर रोजी हा चित्रपट प्रदर्शित होत असून त्‍यात माझ्‍यासह डॉ. मोहन आगाशे, रोहिणी हट्टंगडी, त्रिशा ठोसर, प्रीतम कांगणे यांच्‍या भूमिका आहेत. या चित्रपटाचे दिग्दर्शन विशाल गांधी आणि जैनेश इजरदार यांनी केले आहे. चित्रपटाची संपूर्ण टीम प्रीमियरसाठी गोव्यात आल्याचे जाधव यांनी सांगितले.

‘आतली बातमी फुटली’ या चित्रपटात ज्येष्ठ अभिनेते डॉ. मोहन आगाशे आणि रोहिणी हट्टंगडी यांच्यासोबतच अभिनय करण्याची संधी मिळाली. त्यांच्यासारख्या दिग्गज कलाकारांसोबत एका फ्रेममध्ये दिसणे हीच मोठी व स्वप्नवत घटना आहे.

- सिद्धार्थ जाधव, अभिनेता