डिचोली: शिवकालीन इतिहास असलेल्या आणि छत्रपती शिवाजी महाराजांनी जीर्णोद्धार केलेल्या नार्वे येथील श्री सप्तकोटीश्वर मंदिरातील ऐतिहासिक घडामोडींवर आता चित्रपटाची निर्मिती करण्यात येणार आहे. पर्यटन खात्यातर्फे या चित्रपटाची निर्मिती करण्यात येत असून आज श्री सप्तकोटीश्वर मंदिरात चित्रीकरणही करण्यात आले.

या चित्रपटात छत्रपती शिवरायांचे आगमन, दिवाडी बेटावरून नार्वेला स्थलांतरीत केलेले शिवलींग श्री सप्तकोटीश्वर मंदिराची पुनर्बांधणी आणि आदी ऐतिहासिक घटनांचा समावेश असणार आहे.

या प्रसंगांचे चित्रीकरण करण्यासाठी दिल्लीहून दिग्दर्शक खरबंदा आणि अभिनेता क्रांती झा यांच्यासह अन्य कलाकार मिळून २० जणांची टीम आज नार्वे येथे श्री सप्तकोटीश्वर मंदिरात दाखल झाली. या कलाकारांनी चित्रीकरणही केले. यावेळी मंदिर व्यवस्थापन समितीचे मुखत्यार विजय सरदेसाई, सचिव मंदार सरदेसाई आणि इतिहास अभ्यासक संजीव सरदेसाई उपस्थित होते.

१५४७ साली नरसिंह सरदेसाई यांनी दिवाडी बेटावरून शिवलिंग नार्वे येथे आणले. नंतर १५४९ साली नार्वे येथे छोटेशे मंदिर उभारण्यात आले.

११ शिवलिंग

सप्तकोटीश्वर मंदिरासह राज्यातील ११ शिवलिंग असलेल्या मंदिरांचा इतिहासही चित्रपटात दाखविणार आहेत. शिवलिंगांचे पर्यटनदृष्ट्या अध्यात्मिक महत्व व शिवजयंतीचा प्रसार आणि प्रचार करण्यासाठी पर्यटन खात्यातर्फे या चित्रपटाची निर्मिती करण्यात येत आहे.