Ranveer Singh IFFI controversy: बॉलिवूड अभिनेता रणवीर सिंग याच्या अडचणीत वाढ झाली आहे. गोव्यातील ५६ व्या आंतरराष्ट्रीय चित्रपट महोत्सवाच्या (IFFI) सोहळ्यात त्याने केलेल्या एका कृतीमुळे धार्मिक भावना दुखावल्याचा आरोप त्याच्यावर करण्यात आला असून, हिंदु जनजागृती समितीने त्याच्याविरोधात पोलिसांत अधिकृत तक्रार दाखल केली आहे.

तक्रारीनुसार, रणवीर सिंगने मंचावर कन्नड चित्रपट 'कांतारा – चॅप्टर १' मध्ये दर्शवलेल्या दैवी रूपाची नक्कल केली. यावेळी त्याने चामुंडी दैव या देवतेला 'फीमेल घोस्ट' (स्त्री भूत) असे संबोधले, ज्यामुळे धार्मिक भावनांचा अपमान झाल्याचा आरोप समितीने केला आहे.

कोटीतुळू समुदायाच्या भावना दुखावल्या

हिंदु जनजागृती समितीने आपल्या तक्रारीत म्हटले आहे की, रणवीर सिंगच्या या विडंबनात्मक कृतीमुळे कोटीतुळू समुदायाच्या भावना गंभीररित्या दुखावल्या गेल्या आहेत. चामुंडी दैव हे किनारी कर्नाटकात पूजले जाणारे दैवत आहे आणि त्याच्या रूपाचे असे विकृत सादरीकरण आणि टिप्पणी करणे हा या दैवताचा थेट अपमान आहे, असे समितीचे म्हणणे आहे.

पोलिसांना कारवाई करण्याची मागणी

या गंभीर प्रकरणाची दखल घेऊन गोवा पोलिसांनी रणवीर सिंगवर योग्य ती कायदेशीर कारवाई करावी, अशी मागणी हिंदु जनजागृती समितीच्या प्रतिनिधींनी केली आहे. एवढेच नाही, तर त्यांनी IFFI च्या आयोजकांनाही भविष्यात अशा घटना टाळण्यासाठी एक कठोर आचारसंहिता लागू करण्याची विनंती केली आहे.

यासोबतच, समितीने अभिनेत्याकडून सार्वजनिक माफीची मागणी केली असून, या प्रकरणाचा योग्य निपटारा होईपर्यंत शांततापूर्ण मार्गाने आंदोलनकरण्याचे आवाहन समर्थकांना केले आहे. त्यामुळे रणवीर सिंगला आता या वादावर तातडीने स्पष्टीकरण द्यावे लागणार आहे.