गोव्यात आत्तापर्यंत अनेक दर्जेदार कोकणी चित्रपट तयार झाले. या चित्रपटांनी नवीन विषय लोकांसमोर आणले आणि महत्त्वाचे म्हणजे प्रेक्षकांनी ते चित्रपट डोक्यावर उचलून घेतले. आज आम्ही २०२५ च्या शेवटापर्यंत पोहोचलेलो आहे आणि कोकणी चित्रपटसृष्टीसाठी आनंदाची बाब म्हणजे सध्या दोन दोन कोकणी चित्रपट थिएटरमध्ये चालू असून प्रेक्षकांचा पाठिंबा त्या चित्रपटांना चांगला प्राप्त झालेला आहे.

तसे पाहिल्यास २०२५ हे वर्ष कोकणी सिनेमासाठी एक चांगले वर्ष असे म्हणावे लागेल. हे वर्ष संपता संपता माझा ‘क्लावदिया’ आणि ‘आय सायबा’ हे दोन कोकणी चित्रपट थिएटरात चालू आहेत. ‘क्लावदिया’ हा सिनेमा दुसऱ्या आठवड्यातही हाऊसफुल चालू आहे. ‘आय सायबा’ या चित्रपटाचा हा पहिलाच आठवडा आहे, पण तोही प्रेक्षकांची गर्दी खेचत आहे.

खरे तर दोन्ही चित्रपट अगदी वेगवेगळे, पण प्रेक्षकांना ते आवडत आहेत. कोकणी चित्रसृष्टीसाठी यापेक्षा अधिक आनंदाची गोष्ट नसेल. त्यामुळेच हे २०२५ साल कोकणी चित्रपटसृष्टीसाठी लाभदायक असेच म्हणावे लागेल. गोव्यात चांगले चित्रपट निर्माण व्हावेत. ते तयार करण्यासाठी नवीन निर्माते पुढे यावेत यासाठी गोवा सरकारचे प्रयत्नही बऱ्यापैकी आहेत.

गोव्यातील चित्रपटांना अनुदान देण्याची योजनाही यावर्षी पूर्ण जोमाने चालीस लावली गेली असून गोव्यातील सिने निर्मात्यांसाठी तीही एक दिलासा देणारी गोष्ट आहे. २०२५ साल संपत असताना कोकणी सिनेमासाठी चांगल्या गोष्टी घडत आहेत ते पाहिल्यास येणारे २०२६ सालही असेच चांगले असणार याची आता खात्री वाटू लागली आहे.

कोकणी सिनेमा हा आमचा स्वतःचा सिनेमा ही भावना गोव्यातील प्रेक्षकांमध्ये रुजू लागली आहे हाही एक चांगला संकेत म्हणावा लागेल. शेवटी सिनेमा हा प्रेक्षकांसाठी तयार केलेला असतो. सिनेमाला प्रेक्षकांचा प्रतिसाद मिळणे गरजेचे असते. २०२५ या वर्षात कोकणी सिनेमाला प्रेक्षकांचा प्रतिसाद खरेच चांगला मिळाला आहे. प्रेक्षकांचा हा लोभ येणाऱ्या वर्षातही असाच कायम राहील ही अपेक्षा आहे.

राजेंद्र तालक

(‘क्लावदिया’ चित्रपटाचे निर्माते व दिग्दर्शक)