With Love from Bhutan Director Charmi Chheda

पणजी: आमच्याकडे टेलिव्हिजन १९९९ साली आला. त्यानंतर आता कुठे भूतानमध्ये चित्रपटसृष्टी सुरू होत आहे. भूतान हा लहान देशांपैकी एक आहे, त्यामुळे मोठ्या बजेटचे चित्रपट बनविणे आमच्यासाठी आव्हानाचे ठरते, असे मत ‘विथ लव्ह फ्रॉम भूतान’च्या दिग्दर्शक चर्मी छेडा यांनी मांडले.

छेडा म्हणाल्या की, भूतानमध्ये कलाकार किंवा कलात्मकतेची कमतरता नाही; परंतु आमच्याकडे अजून चित्रपट निर्मिती, अभिनय आदींच्या संस्था तयार झालेल्या नाहीत. आम्ही आता स्वतःच कौशल्याच्या बळावर चित्रपट तयार करत आहोत.

भूतानला जगातील सुखी देश मानले जाते आणि तो आहे देखील; परंतु प्रत्येकाच्या जीवनात काही ना काही चढउतार असतातच, त्याचे चित्रण या चित्रपटातून करण्यात आले आहे. ‘विथ लव्ह फ्रॉम भूतान’ हा चित्रपट सर्वसाधारण भूतानच्या कुटुंबातला घडणारा चित्रपट असून यामध्ये भूतानची संस्कृती दिसून येते.

या चित्रपटात भूतानच्या खाद्यपदार्थ्यांच्या माध्यमातून व्यक्त होणारे प्रेम चित्रित करण्यात आले आहे. आम्ही सांस्कृतिकदृष्ट्या वेगळे असलो तरी मानवाच्या प्रेमभावना समान असतात, त्यामुळे हा चित्रपट सर्वांनाच आवडेल, असे छेडा यांनी सांगितले.

फोटोग्राफरच्या जीवनावर आधारित ‘पी फॉर पापाराझी’

आपल्याला कॅमेऱ्याच्या माध्यमातून टिपलेले अतिशय चांगले फोटो पाहायला आवडतात. आपल्या चांगल्या-वाईट आठवणींना जिवंतरूप देणारी छायचित्रे आपण न्याहाळत असतो; परंतु ती छायाचित्रे टिपणाऱ्या कॅमेऱ्याच्या पाठीमागील व्यक्तीचे वास्तविक जीवन नेमके कसे असते, हे दाखविण्याचा प्रयत्न ‘पी फॉर पापाराझी’ या लघुपटातून केला असल्याचे नवोदित युवा दिग्दर्शक दिव्य खरनारे यांनी सांगितले.

मी माझ्या लहानपणी शाळेतून आल्यावर वृत्तपत्र वाचायचो. या वृत्तपत्रात मी पहिल्यांदा क्रीडा पान पाहायचो आणि नंतर वृत्तपत्रात प्रसिद्ध झालेली चांगली छायाचित्रे पाहत असे. त्यामुळे पूर्वीपासून छायापत्रकारांबाबत एक आकर्षण आहे आणि त्यातूनच या चित्रपटाची निर्मिती झाली. अनेक चित्रपट महोत्सवांमध्ये तो प्रदर्शित होत असून माझ्या आयुष्यातील चित्रिकरणापूर्वी फंडिंग मिळालेला हा लघुपट असल्याचे खरनारे यांनी सांगितले. तसेच समाधानही व्‍यक्त केले.